Þrumuveðrið suðvestanlands

Ég man vel eftir miklu þrumuveðri sem gekk yfir 12. febrúar 1989.  Þá gerði eldingarnar um leið og skörp kuldaskil fóru hjá nærri hádegi í albjörtu.  Eldingaveðrið nú er við svipuð skilyrði, nema það að eldingum lýstur niður í í bogadregnum éljagarði handan skilanna.    Hann sést vel á tunglmynd af vef Veðurstofunnar frá því kl. 14:23 og afstaða hans fyrir suðvestan land miðað við kuldaskilin. 

 

En hvað það veldur því að einmitt skuli verða kröftugt uppstreymi en ekki síðast eða þar áður þegar svipuð staða var uppi.  Þó skal hafa hugfast að "virkni" í klökkunum varir ekki í nema nema skamman tíma sem sást best á því að þegar garðurinn hafði náð Höfuðborgarsvæðinu var mestur krafturinn úr þessu sjónarspili.  Oft verður vart við eldingar sem koma fram á eldingamælum og eru staðsettar yfir hafi suður eða suðvestur af landinu við sambærilega aðstæður.

Mældar eldingar í kerfi VÍ virðast samkvæmt kortinu hafa verið heldur færri en þær voru í raun miðað við lýsingar Suðurnesjamanna.  Ekki veit ég ástæður þessa.  Svo virðist sem raforkudreifikerfið hafa sloppið, en engin tilkynning er úr netrekstri Landsnets um truflanir af völdum eldingaveðursins. 

Athugasemdir

[Jón Hrafn Karlsson (IP-tala skráð) 20.1.2010 kl. 22:05]

Á vef Víkurfrétta er nú flott myndband sem sýnir vel hvað gekk á. 

http://www.vf.is/veftv/frettir/790/default.aspx

[Ágúst H Bjarnason, 21.1.2010 kl. 11:49]

Við vorum á fyrirlestri Helga Björnssonar jöklafræðings á 8. hæð Suðurlandsbrautar 4, en þaðan er mjög víðsýnt.

Við þóttumst telja samtals 11 blossa í áttina að Suðurnesjum ca. milli klukkan 16 og 17:15. Þetta voru allt aðskildir blossar, ekki tvíblossar eins og stundum sjást.

Á leiðinni heim (líklega um 17:30), þegar ég var staddur á móts við Arnarnesið í Garðabæ, sá ég mjög bjartan blossa sem mér sýndist vera yfir Hafnarfirði. Heyrði ekki þrumur vegna vindhljóðs í bílnum.

Þegar ég var kominn heim sá ég enn eina mjög bjarta út um norðurgluggann, þ.e.  yfir Reykjavík. Taldist líða um 6-7 sekúndur þar til hávær þruma heyrðist.

Sem sagt, sá líklega um 13 blossa alls.