Hiti um 4°C yfir meðaltali það sem af er janúar.

Leysingarkaflinn sem enn varir og hófst 2. janúar hefur verið vel hlýr.  Fyrsti dagur ársins var kaldur en þrátt fyrir það er meðalhiti þessa fyrsta þriðjung (tæplega þó) mánaðarins um 4 stigum yfir janúarmeðaltalinu 1961-1990 í Reykjavík og á Akureyri.  Hámarki náði þessi kafli í hita 4. til 5. janúar.  M.a. mældust þá rúmar 11 gráður á Akureyri.

En nú lítur út fyrir að milda loftið fjari smámsaman út næstu dagana um leið og styrkur S-áttar í háloftunum dvínar.   Á sunnudag eru síðan horfur á köldu háloftadragi vestrænnar ættar og með því verður éljagangur og jafnvel snjókoma á landinu, einkum vestantil.  Á meðfylgjandi spákorti (ECMWF af Brunni VÍ) má sjá þennan kalda "vasa" í rúmlega 5 km hæð við landið á sunnudag. Hann stoppar heldur stutt við. Heildregnu línurnar eru síðan þrýstingur við yfirborð.

Framhaldið er síðan mikið til óráðið og óvissa kannski meiri en oft áður.  Langtímareikningar hafa sumir gert ráð fyrir að í nágrenni Íslands byggist upp talsverð fyrirstöðuhæð og þá með veðurlagi sem einkennist af kulda til landsins, hreinviðri og lítilli úrkomu.  Aðrir reikningar gera hins vegar ekki ráð fyrir að slík fyrirstöðuhæð nái að rísa og lægðagangur verði fyrir sunnan og austan landið með NA-átt og hríðarveðri norðan- og austanlands.  Nánast eins og svart og hvítt, en þó má segja að áframhaldandi leysing með suðlægu lofti sé heldur ólíkleg eftir helgina.  Það verður bara eitthvað annað eins og sagt er á boðstólnum í veðri landans. 

Athugasemdir

[Valur Norðdahl (IP-tala skráð) 10.1.2013 kl. 13:21]

Svona mildir kaflar eru þægilegir mannfólki en geta verið skeinuhættir gróðri ef þeir teygjast útí febrúar-mars. Núna er tíðin eins og á vordegi á Reykjavíkursvæðinu og víðar

[Torfi Stefánsson (IP-tala skráð) 10.1.2013 kl. 21:21]

Er ekki verið að spá suðlægum áttum aftur, strax á þriðjudaginn?