Óveðrið í Skagerak olli sjávarflóðum við Jótlandsstrendur

Þessi kómíska mynd er frá suðvesturströnd Jótlands, sunnan Esbjerg og skammt norðan þýsku landamæranna í gær um það leiti sem hvað  hvassast var í Danmörku og Suður-Svíþjóð.  Á þessum slóðum hækkaði verulega í sjónum en það er ekki óalgengt þarna þegar lægðir fara til austurs um norðanverðan Norðursjóinn líkt og í gær.  

 

Þó svo að sjávarhæðin hafi verið 2,5 til 2,75 m yfir venjulegri sjávarstöðu í gær þykja það engin sérstök tíðindi t.d. í Esbjerg og þar eru menn vanir stormflóðum sem þessum. Um er að ræða sjávarfallabylgju sem nær að magnast vegna loftþrýstifalls víðsfjarri og í þessu tilviki vestur af vesturströnd Noregs.  Þetta merkilega fyrirbæri sjávaráhlaðanda verður ekki útskýrt nánar hér, en það er vel þekkt og þess vegna tekst yfirleitt vel að vara við sjávarflóðum “fyrir botni Norðursjávar” af þessum völdum.

 

Það sem er atyglisvert við myndina hér að ofan er að umferðarskiltið er við Ebbevejen svokallaða út í hina láglendu og vinsælu fuglaparadís Mandö við Vedehavet.  Þessi vegur er ekki farin nema að sætt sé sjávarföllum líkt og eiðið út í Gróttu. Engu að síður er þessi ljósmynd afar skemmtileg og athygli vekur að í öldurótinu sést ekkert til dönsku eyjunnar Mandö úti fyrir.   

Tengill sem lýsir frekari staðháttum þessara slóða fyrir áhugasama (á dönsku). 

Ágætt yfirlit DMI um Per, aðdraganda, veður og annað markvert varðandi þessa óveðurslægð í Danmörku.

Veðurútlit á strandstað

Ágætter  að fylgjast með veðuraðstæðum á strandstað með því að skoða veðurathuganir á Garðaskagavita.  Þar hafa verið um 10-12 m/s í nótt, en um 15 m/s voru þar í gær af suðri. Nú er spáð versnandi veðri á þessum slóðum og gerir Veðurstofan ráð fyrir S 20-25 m/s síðdegis og SV 15-20 m/s í kvöld. 

Samfara vaxandi vindi má gera ráð fyrir sjógangur aukist.  Á vef Siglingastofnunar má fylgjast með öldu hæð á Garðskagadufli.  Þar hefur ölduhæðin verið um 3,5 m í nótt, en spár sem sjá má einnig á síðu Siglingastofnunar gera ráð fyrir 5-7 m ölduhæð á svipuðum slóðum.  Síðdegisflóðið er kl. 18:20.  Athyglisvert verður að fylgjast með því hvort skipskrokkurinn á strandstað þolir átökin þegar líður á daginn og hvort þá náist að tæma skipið af olíu fyrir þann tíma. 

Mesta illviðri í Seattle í 10 ár

Óveðrið sem gekk yfir Washingtonfylki í gær er samkvæmt ágætri frétt í Seattle Times það versta á þessum slóðum í yfir 10 ár eða frá því að Inauguration Day stormurinn gekk yfir þann 20. jan 1993.

Veðrið nú er af völdum vetrarlægðar af Kyrrahafi sem gekk yfir suðurhluta Vancouvereyju og í Seattle hefur því blásið af SV og V án þess að ég hafi kynnt mér það til hlýtar.  Vindurinn á alþjóðaflugvellinum Seattle Tacoma for í hviðum  í rúmlega 30 m/s og er það mesti mældi vindur á flugvellinum í 30 ár.

Mikið rigndi samfara lægðinni og urðu flóð í borginni.  En það eru myndarleg barrtréin sem gafa sig í verstu stormum á sessum slóðum eins og myndin ber með sér.  Fallin tré og stofnar liggja þá eins og hráviði um allt og fólki er mest hætta búin að keyra á tré eða fá það yfir bílinn.

Þess er getið að mikið hafi snjóað í fjöllunum inn  til landsins (Klettafjöll) um leið og lægðin fór inn yfir meginlandið. 

Að minnsta kosti sex látnir í illviðri í NV-Bandaríkjunum

Loftþrýstifallið á Garðskagavita

Garðskagaviti er okkar útvörður þegar veðurkerfin nálgast úr suðvestri eins og nú er raunin.  Á milli kl. 18 og 21 féll loftvogin þar um 15,2 hPa.  Það er vissulega með því meira sem maður sér og til merkis um ört vaxandi vind af SA. 

Hægt er að fylgjast með vindi af mælum beint á tveimur stöðum: Annarsvegar á vef Veðurstofunnar, en þar uppfærast upplýsingar í töflu á klst. fresti.  Hins vegar hjá Vegagerðinni þar sem á flestum stöðvunum eru nýjar upplýsingar að hafa á 20 mín fresti. Eins gefur það góða raun að sjá filgja eftir skilunum á ratsjánni á Miðnesheiðinni af Brunni Veðurstofunnar. 

Sjálfur er ég fjarri góðu gamni að þessu sinni. en fylgist vel með úr fjarlægð.

Rigningin á Kyrrahafsströnd Bandaríkjanna

Eitt og aðeins eitt slær mig þegar ég les frétt Morgunblaðsins af því að það stefni í úrkomumet í borginni Seattle fyrir einstakan mánuð, en það er að í þýðingu blaðamannsins er úrkoman sett fram í einingunni cm.  Þannig er talað um að metið sé 38,94 cm í mældri úrkomu.  Þetta er ekki íslensk "málvenja" ef svo má segja.  Hér er venja að tala um mm. úrkomu.  38,94 cm eru sama og 389,4 mm sem er stærð sem lesendur þekkja öllu betur.

Annars á ég von á því að sá nóvembermánður sem nú er að líða verðu nokkuð óvenjulegu í veðurfarstilliti víða um hina norðlægu slóð.  Við sjáum hvað setur. 

Nóvember er votviðrasamur víða um heim

Hitaandstæður

Í morgun var farið blása af austri með suðurströndinni vegan lægðar sem nú nálgast.  Í Vestmannaeyjabæ var hitinn +4°C.  Á Norðurlandi er hinsvegar enn talsvert frost og varð það mest í nótt 18 stig á Grímsstöðum á Fjöllum. 

Hitaandstæður sem þessar á milli suðurstrandar landsins og innsveita Norðausturlands eru hins vegar alvanalegar að vetri til þó svo að vera nokkuð stórar í sniðinu.

Sér ekki út úr augum norðaustanlands

Eins og sést á þessu veðurkorti af mbl.is, sem hefur gildistíma í dag 11. nóv kl. 06 að þá er lægðin komin austur fyrir land.  Hún er farin að grynnast, engu að síður er enn slæmt veður vegna hennar alvíða á landinu.  Nú er vindáttin norðanstæð allt hlýtt loft löngu farið hjá og fryst hefurá landinu. 

Um og yfir 20 m/s voru norðaustanlands og á Tjörnesi og Melrakkasléttu sá ekki úr augum sökum ofankomu og skafrennings. Sva er vafalítið víðar.  Snjókoma eða þéttur éljagangur virðist vera frá Skagafirði austur um á Hérað eða svo.  Þá er líka sums staðar hvasst sunnantil, t.a.m. um og yfir 25 m/s á Stórhöfða í N-áttinni, en veður er að verða nokkuð skaplegt vestantil.

Svo má á kortinu sjá næstu lægð koma askvaðandi úr suðvestri.  Komið verður SA-hvassviðri með þýðu á landinu á morgun.  Eins og er virðis þessi lægð ætla að vera tiltölulega "saklaus" í samanburði við þá síðustu og sunnudagslægð fyrri viku.     

Íslenska rokið útflutningsvara ?

Það er bara fyndið að á meðan farþegaflug liggur niðri í rokinu skuli á sama tíma koma Airbus-vél af stærstu gerð hingað uppeftir til Íslands til æfinga og prófana í hliðarvindi. Og vélin fær að spóka sig í þokkabót nánast ein á Keflavíkurflugvelli.   Ég þykist vita að framleiðendur og hönnuðir þessarar véla hafi verið á útkíkki í nokkurn tíma eftir virkilega vondu veðri.  Í gær þegar veðurspár gáfu í skyn hvað verða vildi hér við Keflavík hefur verið drifið í að fljúga vélinni í veg fyrir óveðrið.

Vitanlega er þetta "undarlega háttarlag flugvélar um nótt" hluti af nauðsynlegum prófunum á þoli  áður verður farið að fylla Airbussinn af farþegum.  Þetta minnir á þegar Flugfélagið tók í notkun nýja gerð Fokkervéla líkast til 1992 eða 1993.  Þá fylgdu þeim sérfræðingar frá verksmiðjunum í Hollandi og voru íslensku flugáhöfnunum til halds og trausts.  Vélarnar komu um miðjan vetur, febrúar minnir mig beint inn í illviðrabálk.  Hollensku kennarnir þóttust góðir að hafa komist heilir heim eftir hristinginn og skakið í þeirra eigin vélum yfir Íslandi. en Fokkerarnir sýndu og sönnuðu eina ferðina enn hversu megnugar og öruggar þessar vélar eru fyrir íslenskar aðstæður.     

Stærsta farþegaflugvél heims æfir aðflug á Keflavíkurflugvelli

Ekki beint árennilegt spákort morgundagsins

Spákort Bresku Veðurstofunnar fyrir hádegi á morgun er ekki beint árennilegt.  954 hPa lægð yfir Húnaflóa eins og sjá má.  Á hádegi í dag var lægði 995 hPa og til morguns mun leið henna r liggja yfir suðvestanvert landið samkvæmt tölvureiknuðum spám. Veðurstofan spáir allt að 28 m/s suðvestanlands í SV- og V-átt í fyrramálið.

Við fylgjumst áfram með...

Veðrið varð einna verst á Snæfellsnesi

Illviðrið sem gekk yfir landið í morgun virðist hefa komið einna verst við Snæfellinga a.m.k. það sem af er.  Það náði hámarki upp úr kl. 09.  þá var 10 mínútna meðalvindur 30,1 m/s á Gufuskálum og 25,6 m/s á Grundarfirði.  Þar kom hviða á 10. tímanum upp á 43,9 m/s.  Ekki er ólíklegt að hluti þaks sem fauk af grunnskólanum á Grundarfirði hafi farið í þeirri hviðu.  Uppi á Fróðárheiði var enn hvassara eða 38 m/s og vindhviða upp á 49 m/s.  Það er líkast til snarpasta hviðan í þessu veðri sem ég hef enn sem komið er komið auga á.

Í Reykjávík á Veðurstofunni náði vindurinn ekki stormstyrk, fór í 20,3 m/s en 20,8 þarf til þess að það teljist stormur.  Hins vegar var ívið hvassara á Reykjavíkurflugvelli og á berangrinu í Geldinganesi 24,2 og 32,3 m/s í mestu hviðu.

Lægðin vark kl 06 í morgun eins og sést á greiningarkorti bresku veðurstofunnar.  Hún er þegar þetta er skrifað  (um kl. 12) úti af Húnaflóa eða Skagatá.  Fer hún hratt til austurs í dag.  Í hádeginu var farið að hvessa á Norður- og Austurlandi og kl. 12 voru t.a.m. 27 m/s á Bergsstöðum í Skagafirði.  Það er þekkt hversu V-áttin getur verið byljótt á Norður- og Austurlandi og við fylgjumst því áfram vel með vindmælum í dag.

Hér til hliðar getur að líta spá úr Íslandslíkani af slóðinni belgingur.is.  Spá sem gefin var út í gærkvöldi gaf það skýrt til kynna að vindur af hafi við Snæfellsnes yrði til jafnaðar 25,0 til 27,5 m/s. 

Vind tekið að lægja á suðvesturhorninu