Vonska í veðrinu

Svo er að sjá sem myndarleg lægð komi upp að landsteinunum á sunnudag, með hvössum vindi og mikill úrkomu suðaustanog austanlands.  Veðurstofan talar um talsverða úrkomu suðaustanlands í sinni spá á sunnudag.  

Á spákortinu hér til hliðar af veðurvef Morgunblaðsins sést hvar lægðin er í uppsiglingu suðvestur af landinu þá þegar 974 hPa að dýpt.  Úrkomu er spáð austanlands á morgun samfara norðaustanstrekkingnum.  Megin úrkomusvæði lægðarinnar er þá ókomið að Suðaustur- og Austurlandi en gera má ráð fyrir að það rigni frá því snemma á sunnudag.  Örin bendir hins vegar  á bylgjumyndun á kuldaskilunum sem berast mun hingað upp að ströndum landsins austantil á sunnudagskvöld og aðfararótt mánudagsins með telsvert ákafri úrkomu.  Á sama tíma dýpkar lægðin heldur á nýjan leik.

Neðra spákortið   sem gildir kl. 06 á mánudagsmorgun sýnir glöggt úrkomusvæðið yfir austanverðu landinu og lægðina sem spáð er 963 hPa. 

Þetta er allt saman frekar stórkarlalegt og eins og ætíð þegar svo háttar spennandi fyrir veðurfræðinga og annað áhugafólk að fylgjast með framvindu mála.

 

 

 

Hlýr september, ekki aðeins hérlendis.

Fram kemur í yfirlit Veðurstofunnar að septembermánuðu hafi verið 3,1°C yfir meðallagi í Reykjavík og meðalhitinn á endanum verið 10,6°C sem ekki langt frá júlíhitanum eins og hann var 1961-1990. Á Akureyri og Höfn var frávikið frá meðalhita heldur minna.  Í Reykjavík hefur aðeins þrisvar sinnum áður verið hlýrra í september, tvistvar mun hlýrra eins og ég rakti í pistli fyrir nokkru síðan.

Í Suður-Noregi mánuðurinn sá hlýjasti frá upphafi mælinga 1867 og þar voru nokkur dæmi um 4,0 - 4,5°C yfir meðaltalinu.

Á Bretlandseyjum í heild sinni var mánuðurinn einnig sá hlýjasti frá upphafi mælinga eða 3,1°C yfir. Þeirra viðmiðun nær aftur til 1914 og næst hlýjasti mánuðurinn var árið 1949 líkt og gamli metmánuðurinn í Noregi.

Í Danmörku var hitametið jafnað, en þar á bæ er minnt á annað nokkuð skemmtilegt, þ.e. aldrei áður í september í 132 ár mælingasögu hefur lægsti mældi hiti í Danmörku  verið hærri ! Lágmarkshitinn var 4,3°C en í frétt á vef Dönsku Veðurstofunnar segir að flest árin hafi náð að frysta einhvers staðar í Danaveldi (Grænland og Færeyjar ekki með)  áður en september er allur.

Þessi metmánuður kemur eftir álíka afbrigðilegan Júlí í Vestur-Evrópu.  Hitafrávikin voru þá meira bundin við meginlandið, en síður úti við Atlantshafið.

September ekki hlýrri í Reykjavík síðan 1958

Óljóst og ótrúlegt skýjafyrirbæri

Jón Ingi Cæsarsson á Akureyri tók þessa ótrúlegu mynd í Mývantsveitinni 10. september undir kvöld.  Það er líkt og rósrauða skýið ofantil reki niður horn. Eða hvað annað getur þetta verið?  Aðrar myndir af þessu fyrirbæri útiloka að við myndina hefur verið átt, þ.e. hún er ekki "fótosjoppuð".

Til greina kemur að þetta sé rák eftir flugvél, en háskýjin á bakvið vinna gegn þeirri tilgátu því venjuleg flughæð er ofan slíkra skýja.  Gæti þetta hafa verið loftsteinn, er að brenna upp á leið sinni um gufuhvolfið ? Ja hvað leggja aðrir til ?  Hvað haldið þið ?

Tillögur og vangaveltur vel þegnar ! 

Gordon mun hafa áhrif á fyrsta dag Ryder

Mikið er fjallað um leifarnar af fellibylnum Gordon í Breskum og írskum blöðum í dag.  Í morgun fór hann yfir Azor-eyjar, sem betur fer án þess að valda verulegu tjóni.  Tunglmyndin hér sýnir fellubyljaleifarnar allvel, þ.e. hvíti hnúðurin neðst á myndinni er Gordon

Náði vindurinn 33 m/s sem þykir nú ekki mikið þegar fellibyljir eru annars vegar, enda hefur Gordon veikst mikið nú síðasta sólarhringinn eða svo.  Næstu daga mun hann skola úr sér þeirri úrkomu sem hann enn býr yfir og og bætist nokkuð við þegar hann verður hrifsaður af  veðraskilunum eða úkomusvæðinu sem sjá má á myndinni.  Þó að Breska Veðurstofan fari varlega í það  að álykta hvað verði um ferðir þessa sem eftir er, er að sjá að veðurlíkön séu eindregið á því að úrkoma verði nokkuð áköf á Írlandi á föstudag og Suðvestur-Englandi samfara hálfgerðu hitabeltislofti.  Það eitt út af fyrir sig bendir eindregið til þess að restarnar af Gordon séu þarna á ferðinni 

Ryder-golfmótið gæti því hæglega lent í tómu tjóni á föstudag, fyrsta keppnisdaginn, ofan á alla þá bleytu sem fyrir er og farið er að tala um að gera strax ráð fyrir varadegi á mánudag ein og sjá má hér í nýrri frétt BBC

 

Woosnam hefur áhyggjur af veðrinu

Leifarnar af fellibylnum Gordon til Bretlands

Á meðfylgjandi veðurkorti frá Bresku Veðurstofunni og er greining veðurs eins og það var á hádegi má sjá að Gordon er greinilegur á Atlantshafi.  Hin víðáttumikla lægð norðurundan mun gleypa Gordon næsta sólarhringinn og áhrifa hans mun gæta síðar í vikunni á Bretlandseyjum. 

Breska Veðurstofan hefur m.a. varað landmenn síðna við staðbundnu úrhelli og að vindasamt geti orðið sunnan og vestantil á Englandi svo og á Írlandi. Einnig er talað um að á stöku stað gæti orðið hásjávað.  Ekki er gert mikið úr þessu og kannski meira talað um hlýindi samafara loftmassa sem upprunnin er suður undir miðbaug og að hitinn gæti jafnframt komist í 28°C.

Við sjáum hvað setur, en Bretarnir hafa góða yfirsýn, enda mestur kraftur úr honum Gordon.     

Fellibylurinn Gordon nálgast Bretland

Florence nálgast Nýfundaland

Hitibeltislægðin Florence, sem rétt nær því um þessar mundir að verða fimmta stigs fellibylur virðist ætla að stefna á suðurodda Nýfundaland eins og meðfylgjandi spákort Bresku Veðurstofunnar ber með sér (stækkið myndina !).  Fellibyljastofnunin í Bandaríkjunum er þó á því að Florence fari hjá að mestu.  Nýfundlendingar munu því líklega sleppa með skrekkinn.  Á kortinu sést vel hvað hitabeltislægðin er hringlaga þó svo að hún sé kominn yfir frekar kalda yfirborðssjó.  980 hPa í miðju, en hún er kröpp.  Takið eftir að lægðin suður af Íslandi er nokkru dýpri, en hún er alveg hefðbundin í sniðinu.

Stundum gerist það að fellibyljarestar eins og Florence verður víst orðin á morgun, berast í veg fyrir nýmyndun lægðar og sameinast henni.  Hin ákveðna hringhreyfing og uppstreymi í leifum fellibylsins virka þá sem vítamínsprauta á hina nýmynduðu lægð þannig að úr verða hávaðahvellir.  Ekkert slíkt er þó í uppsiglingu með Florence, þar sem hún hittir ekki fyrir lægð. Slík myndun er sem betur fer sjaldgæf, en í umfjöllun Morgunblaðsins um  Pourquoi-Pas slysið 1936 síðasta sunnudag var það rifjað upp af Trausta Jónssyni að líkast til hafi ofsaveður sem komu í septembermánuði 1901,1906 og örugglega 1973 verið samsláttur lægðar og restar af fellibyl.  Ekki er heldur hægt að útiloka að sú hafi einnig verið raunin 1936.  Þó getur hæglega hafa verið svipað upp á teningnum þá og nú við Nýfundaland, þ.e. hitabeltislægð rak hingað norðureftir án þess að hefðbundin lægðarmyndun samfara komi þar við sögu.  Tek fram að slíkar pælingar eru frá frá mér komnar og alls óvíst að aðrir séu því  sammála.

Nú stefnir í frost á landinu í nótt !

Sá nú rétt áðan að hitinn á Brú á Jökuldal (366 m) hefur fallið hratt í kvöld og var kl. 23 kominn niður í 1,4°C.  Norðan Vatnajökuls er léttskýjað og vindur hægur.  Þarnu mun því pottþétt frysta í nótt.  Hægt er að skoða klst. gildi hitans ásamt lágmarki hverrar klukkustundar á Brú á Jökuldal beint af vef Veðurstofunnar.

Annars komst hitinn í dag í 17,1°C í SV-áttinni í Neskaupsstað.  Það þykir bara ágætishiti komið þetta fram í september.

Golfstraumsráðstefnan hefst á morgun

Nú er komið að Golfstraumsráðstefnunni sem hefst á morgun á Hótel Nordica. Um er að ræða tveggja daga ráðstefnu um loftslagsbreytingar, hafstrauma og vistkerfi í Norður-Atlantshafi.  Margir af fremstu vísindamönnum sem hafa verið að rannsaka áhrif loftslagsbreytinga á hafstrauma í Norður-Atlantshafi munu greina frá nýjustu niðurstöðum sínum.

Sjálfur hef ég mestan áhuga á morgundeginum þegar haffræðingar ætla að ræða um heilsu Golfstraumsins um þessar mundir.  Fyrstur vísindamanna er Færeyingurinn Bogi Hansen, en fyrir skemmstu sagði ég frá áhugaverðum vangaveltum hans.

Ráðstefnan er öllum opin og á hana kostar ekkert.  Upplagt fyrir áhugasama um samfélög og náttúru norðurslóða að líta við.  Hér er tengill á auglýsingu um ráðstefnuna. 

Áfram verður berjatíð

Í dag 7. september er ekki að sjá annað að ótýnd ber landsmanna fái áfram að þroskast á lyngi sínu, því næturfrost næstu daga verður að teljast harla ólíklegt.  Það er einna helst að sjá í spákortunum að mögulega, en aðeins mögulega geti hugsanlega gert næturfrost á Vestfjörðum aðfararnótt nk. þriðjudags, eða 12. september. 

Fram yfir helgina er fremur hlýtt loft úr suðri og suðvestri í aðalhlutverki með vindbelgingi og vætu í flestum landshlutum.  Áfram má því týna berin blá og gómsæt.

Lítur afar vel út með veðrið á Danaleiknum í kvöld

Gera má ráð fyrir að þegar flautað verður til leiks í Laugardalnum kl. 18 í dag verði afar hægur vindur af suðri, 1-2 m/s og 12°C. Bjart veður, en háskýjabreiðu dregur upp á suðvesturhiminnin á meðan á leiknum stendur.  Sem sagt það lítur út fyrir að veðrið verði eins og best verður á kosið fyrir þær þúsundir sem hafa orðið sér úti um miða.