Hlýrra að koma út í morgun

Í morgun þegar ég fékk mér göngutúr upp úr kl. 7 fannst mér eins og það væri að hlýna miðað við undanfarna daga.  Ef til vill var þetta bara tilfinning nú þegar N-áttinn er loks gengin niður og morgunsólin skein glatt.  Staðreyndin er hins vegar sú að enn frysti í Reykjavík í nótt og var lágmarkshitinn -1,3°C.  Frost var í nótt um mikinn hluta landsins líkt og undanfarna daga.

Í raun fer maður ekki að finna snemmsumarbragð af loftinu fyrr en meginveðraskilin, sem skilja að heimskautaloftið og heittempraða loftið í suðri ná að komast norður fyrir land.  Síðustu daga hafa þau haldið sig langt suður í Atlantshafi, en nú fyrst eygir maður von, en tölvuspá ECMWF gerir nú í morgun ráð fyrir því að eftir helgi gætu meginskilin náð til landsins.  Spákortið sem hér fylgir með er fengið af veðurvef mbl.is þar sem þar má nú nálgast aðgengileg spákort úr keyrslu ECMWF .  Spákortið gildir fyrir mánudag 29. maí kl. 18 og lægðin sem þarna er spáð fyrir sunnan Hvarf gæti hæglega borið með sér hýtt og vænt loft sem bærist alla leið til Íslands þegar kemur fram í vikuna.  Það kostar í það minnsta ekkert að vera bjartsýnn !!

Ótrúlegt að skólahald falli niður vegna ófærðar 23. maí

Í þessari frétt mbl.is kemur m.a. fram að skólahald hafi fallið niður í Litlulaugaskóla í Þingeyjarsveit í morgun.  Það er með ólíkindum og væntanlega aldrei áður gerst á þessum árstíma að ekki sé hægt að sækja skóla vegna ófærðar.  Hér áður fyrr var þó fyrir löngu búið að hleypa börnum heim í vorið í sauðburð og því samanburður í skólahaldi í 4. viku sumars vafasamur !

Úrkoma mældist á Staðarhóli síðasta sólarhriginn 39 mm að mestu í gærkvöldi og nótt.  Hiti hefur verið þar um og undir frostmarki og því eingöngu snjóað.  Snjódýptin í Aðaldalnum reyndist líka vera 27 sm í morgun.   Mest úrkoma sl. sólarhring reyndist hins vegar vera á Eskifirði eða 52 mm.  Í byggð á Austfjörðum rigndi eða úrkoman var í formi slyddu.  Á fjallvegum snjóaði hins vegar.

Þetta tíðarfar er afbrigðilegt, á því leikur engin vafi.  

Á dráttarvélinni til vinnu

Frost um allt norðaustanvert landið í morgun

Í morgun kl. 09 var eins stigs frost um nánast allt norðaustanvert
landið og mest fimm stig á Grímsstöðum á Fjöllum. Ofan í þetta
hrakviðri gekk á með dimmum éljum. Útlit er fyrir enn versnandi veður á
þessum slóðum, snjókomu og slyddu á morgun.  Úrkoman verður mikil
á sólarhringsvísu eða allt að 50-70 mm sýnist mér.  Samfelld og
mikil úrkoma, slydda eða snjókoma mun vara frá því í fyrramálið og fram
á þriðjudagskvöld, gangi spár eftir.  Alvöru maíhret sem þetta
veldur fjárbændum alla jafna miklum vandkvæðum þar sem taka þarf allar
lambær á hús.  Á Norðausturlandi eru mörg myndarleg fjárbú, s.s. í
Öxarfirði, Þistilfirði, Vopnafirði og á Jökuldal.  Samgöngur mun
lílega einnig raskast, vegir á Norður og Norðausturlandi munu verða
þungfærir eða ófærir, svo ekki sé talað um lélegt skyggni sem fylgir
hríðinni á fjallvegum.

Kuldar og ófærð á norðaustanverðu landinu

Kuldinn fyrir norðan séður með auga Vegagerðarinnar

Meðfylgjandi mynd er úr myndavél Vegagerðarinnar á Mörðudalsöræfum í 550 metra hæð frá því í morgun  Það er vissulega kuldalegt þarna um að lítast vægt frost, éljagangur og snjófjúk. Áfram er útlit fyrir hálfgerðan vetur á þessum slóðum að minnsta kosti fram á þriðjudag.  Skoðið endilega vefmyndavélar Vegagerðarinnar, þær segja sýna sögu.

Sólarmegin í tilverunni ?

Veðurkortið sem hér sést sýnir skýjahulu yfir landinu eða öllu heldur er þetta spá um skýjahulu á morgun laugardag  kl. 12 reiknuð úr líkaninu HIRLAM-T sem reiknað er í Danmörku tvisvar á sólarhring.  Ef mark er takandi á þessari spá um skýjahula segja að útlit er fyrir að alskýjað verði víðast um norðaustanvert landið, en lítið um ský suðvestan- og vestanlands um Dali og norðum um Strandir og Húnaflóa.  Þó er spáð að skýjabakki nái inn á Vestfjarðakjálkann og yst á Snæfellsnesi.  Fróðlegt verður að sjá sannprófun á þessari spá á morgun, en það er hægt að gera á tvennan hátt, annars vegar með því að skoða skýjahulu veðurathuguna og hins vegar með því einfaldlega að bera saman samskonar kort á morgun, þ.e. spánna saman við greiningu 12-keyrslunnar á morgun.   

Hægt að fylgjast með úrkomuframvindu við Boston

Mér sýnist á veðurkortum að rignt hafi meira og minna á þessum slóðum frá því á föstudag. Ég hef ekki enn hins vegar rekist á neinar tölur um úrkomumagn.  Þessi samfellda rigning er vegna nær kyrrstæðra veðraskila sem liggja þarna yfir ströndina frá hafi nærri Boston.  Skilin berast ekki norðar  þar sem fyrirstöðuhæð norðurundan heftir framrás þeirra.  Á meðan berst látlaust rakt loft af hafi.

Þeir sem hafa áhuga geta fylgst með þróuninni á síðu sem sýnir úrkomu hverja klst. frá veðurradar sem mér sýnist vera staðsettur við Boston.

Búist við miklum flóðum í Massachusetts

Loft af norðlægum uppruna allsráðandi

Svo er að sjá að hæðin sem verið hefur fyrir norðan land og yfir Grænlandi sé ekkert að fara að gefa sig.  Það þýðir að loftið sem hingað berst er mest af norðlægum uppruna og því kalt og þurrt.  Á sama tíma ganga lægðirnar hver af annarri yfir Bretlandseyjar með rigningu.  Eflaust veitir þeim ekki af vætunni því þar hefur verið óvenjuþurrt í vetur og í Suður-Englandi var veturinn sá þurrasti í 80 ár.

Spákortið gildir fyrir nk. laugardag og er úr keyrslu Evrópsku reiknimiðstöðvarinnar (ECMWF) frá því í gærkvöldi.  Glöggt má sjá hvernig köldu loft er spáð yfir landið og á það uppruna sinn lengst norðan úr höfum. Hitakvarðinn miðast við hitastig loftsins í 850 hPa fleti eða 1200-1400 metra hæð.  Fært til yfirborðs þýðir ef spáin gengur eftir að vægt frost frost verði norðanlands og næturfrost víða sunnantil.

Það er ekki að sjá í veðurspám neinar breytingar frá þessari lofthringrás næstu 7 til 10 dagana hið minnsta.    

Mistrið er að hluta til frá Suður-Póllandi

Á síðu Veðurstofunnar vedur.is hefur verið sett inn kort sem rekur uppruna þessa sérkennilega lofts sem yfir landinu er um þessar mundir. Síðdegis í gær var það rakið til Suður-Póllands og Eystrasaltslandanna.

Hún er glæsileg myndin frá Vestmannaeyjum sem fylgir fréttinni.  Spurning hvort fólk lumi á fleiri slíkum myndum sem teknar hafa verið að undanförnu.  Sendið endilega á mig ([e-mail]) ef þið viljið koma þeim á framfæri.

ESv

Þurramistur gefur okkur fallegt sólsetur

19,3°C á Þingvöllum í hádeginu

Staðan nú er þessi:

Þingvellir: 19,3°C

Kálfhóll á Skeiðum: 19,1°C

Skálholt: 18,9°C

Árnes: 18,8°C

Hæll 18,3°C

Allir þessir staðir eru í sveitarfélögunum Bláskógabyggð og Skeiða- og Gnúpverjahreppi.  Hjarðarland vantar að þessu sinni, en líklegast er hitastigið þar á svipuðu róli. Sérstaklega er merkilegt að sjá Þingvelli, en þar frysti í nótt, hvort sem þið trúið því eða ekki. Ótrúlegt að sjá hitastigði rjúka þarna upp frá 1°C kl. sex í morgun upp í19°C og það á aðeins 6 klst.Þessa ótúlegu þróun má berja augum á þessu línuriti. 

Þó hlýtt sé í uppsveitum Suðurlands er heldur svalt fyrir norðan og ekki nema 3°C norður á Skaga í þokulofti. 

Hitinn 19,2° C þennan væna sunnudag

Á vafri mínu á milli veðurstöðva nú síðdegis fann ég hæsta hitagildið 19,2°C á Þingvöllum um kl. 14 í dag.  Vel má vera að þegar lesið verður af hámarksmælum kl. 18 finnist enn hærri tala. 

Í Reykjavík var hitinn 17,6°C kl. 15, en þá þegar hafði þykknað upp frá skýjabaka sem kom úr suðaustri og sjá má á tunglmyndinni sem tekin var um tvöleitið.  Hefði áfram verið bjart sunnanlands og vestan líkt og í morgun er ekki ólíklegt að hitinn hefði farið yfir 20°C á hagstæðum stöðum.  Það gæti hins vegar gerst á morgun mánudag því verður loftið yfir landinu ívið hlýrra en í dag og eins er reiknað með að heiður himinn verði um nánast allt land ef Vestfirðir og norðurströndin eru undanskilin.  Á móti vinnur að   hafgola gæti gert vart við sig síðdegis. 

Þessi vænu og velkomnu vorhlýindi munu vara sunnanlands og vestan fram á þriðjudag, mðvikudag, en eftir miðja viku er spáð kólnandi.