Hafísinn á korti frá Landhelgisgæslunni

Frá því fyrir áramót hefur ísjaðarinn verið að færast nær landi úti fyrir Vestfjörðum.  Ástæðuna má fyrst og fremst rekja til óhagstæðra vinda, þ.e. SV-átt og reyndar áttleysu framan af eins og rætt var um hér þann 4. jan.

Landhelgisgæslan sendi þyrlu í dag vestur í ískönnun og flaug hún meðfram ísröndinni á þeim kafla þar sem hann er næstu landi.  Meðfylgjandi kort er riss eftir það flug frá Gæslunni og sótti ég það á hafíssíðu Ingibjargar Jónsdóttur. Veðurstofan gefur líka úr kort og birtir hafístilkynningar. 

Víst er ísinn nærri og það ræðst af vindafari næstu daga og vikna hvað gerist.  Eindreginni SV-átt er spáð á morgun og fram á þriðjudag, en þá eru breytingar líklegar.  Verði vindur þá norðanstæður, annað hvor hánorðan eða norðvestanstæður, væri ísinn ekki lengi að  að ná landi við Horn og Straumnes.  Það gerist vart í þessari lotu því A-lægur vindur er líklegri og hann nær, fái hann að blása óáreittur í nokkra daga, að losa um stífluna og hrekja ísinn fjár landi.  

Annars vorum við Óli Þór Árnason veðurfræðingur að ræða um ísinn uppi á Veðurstofu fyrir helgi. Óli Þór, sem kominn er af nafntoguðum sjósóknurum norðanlands, sagði að fullyrt væri að þegar ísinn næði inn í Reykjafjarðarál á utanverðum Húnaflóa, væru straumar þar þannig að þá ræki hann hratt inn allan Húnaflóa.  Vitanlega spilar vindafarið þarna líka inn í.  Með öðrum orðum þarf ekki svo mjög að hafa áhyggjur af því að hafís verði til verulegra vandræða fyrr en hans verður vart á Reykjafjarðarál.   Til nánari glöggvunar er Reykjafjarðaráll nærri þeim stað eða skammt út undan þar sem stafurinn -n- sleppir í staðarheitinu Horn á korti Landhelgisgæslunnar.   

Athugasemdir

[Þorkell Guðbrands (IP-tala skráð) 11.1.2010 kl. 08:08]

http://www.dailymail.co.uk/sciencetech/article-1242011/DAVID-ROSE-The-mini-ice-age-starts-here.html                 Jæja, nú eru menn komnir yfir í bakborða.

[Árni Gunnarsson, 11.1.2010 kl. 23:37]

Fjári ertu víða tengdur Þorkell! En ef þú lítur hingað aftur þá; til hamingju með aldeilis frábæra vinnu og verklok við afmælisrit Kaupfélags Skagfirðinga!

En nú sýnist mér að brugðið geti til beggja vona með grásleppuvertíð.

[Höskuldur Búi Jónsson, 12.1.2010 kl. 00:24]

Það má eflaust geta þess að orð Latifs í greininni sem Þorkell bendir á, virðast vera rifin úr samhengi: http://www.guardian.co.uk/environment/2010/jan/11/climate-change-global-warming-mojib-latif

[Þorkell Guðbrands (IP-tala skráð) 12.1.2010 kl. 09:18]

Takk fyrir hlý orð í garð bókarinnar, félagi Árni! Reyndar er ekki sanngjarnt að eigna mér of mikið í þessu kveri, en ég vona að einhverjir hafi gaman af. - Eins og Höskuldur Strandamaður og jarðfræðingur bendir á, þá er ekkert ólíklegra en ósvífnir blaðasnápar teygi og togi allt sem sagt er, slíti úr samhengi og fari rangt með ef það bara þjónar þeim tilgangi að selja blöðin, sem í hlut eiga. Það þekkjum við líka hér á landi, en þó munu breskir snápar vera ósvífnastir allra meðal þessara svokölluðu "siðmenntuðu" þjóða.