Kjarngott lægðafóður

Veðurkortið sem ég sýni hér er úr smiðju GFS líkansins bandaríska og sjónarhornið er norðaustur-Atlantshaf og Labradorhaf þar sem miklar andstæður í lofti á svæðinu hafa í aldanna rás skapað marga illviðrislægðina. Nú er einmitt eitthvað í þá veru í farvatninu.  Kortið hefur gildistíma kl. 06 í morgun ( spá 24010000 +6t) og sýnir ástand mála í 850 hPa fletinum sem þarna er í um 1.200 - 1.400 metra hæð.  Hitinn þarna uppi er litaður og glöggt má sjá hversu mikill hitastigullinn er á tiltölulega stuttri vegalengd.

Skammt suðvestur af lægðarmiðjunni sem þarna er í uppsiglingu er hiti +10°C, en eitthvað um -17 til -18°C yfir Nýfundnalandi.  Þar flæðir heimskautaloftið úr norðvestri út á Atlantshaf í veg fyrir heittempraðan og rakan loftmassann sem kemur askvaðandi úr suðri.  Þetta er vissulega algeng sjón yfir vetrartímann en þegar saman fer að streymi þessa mjög svo ólíku loftmassa er í góðum fasa og líka þegar hitamunur þeirra er meiri en góðu hófi gegnir losnar um mikla orku þegar lægðin dýpkar og umhverfis hana taka að blása hvassir vindar.

Að þessu sinni verður að segjast að fóður lægðarinnar er bæði mikið og kjarngott.  Hún kemur til með að kjamsa vel á því næstu tvo sólarhringanna, en það sem verra er að spálíkönum virðist bera saman um það og hún taki stefnuna beint til okkar, að hún fari skammt vestan við landið á talsverðri siglingu seint í nótt og í fyrramálið.    

Athugasemdir

[Rafn Haraldur Sigurðsson (IP-tala skráð) 24.1.2010 kl. 11:10]

Og ég sem ætlaði að hjóla í vinnuna

[Þorkell Guðbrandsson (IP-tala skráð) 24.1.2010 kl. 14:27]

Satt segir þú, Rafn Haraldur. Ég reyni líka að hjóla á morgnana, svona klukkutíma eða svo. Maður þarf að vera viðbúinn því að það gangi ekki í fyrramálið.

[Grefillinn Sjálfur - Koma svo! (IP-tala skráð) 24.1.2010 kl. 20:28]

Það verður bara notanlegt að kúra heima í snarvitlausu veðri og horfa á íslenska landsliðið taka það króatíska 29-26.