Athyglisverð mæling frá nýjum vindmæli

Í haust var settur upp vindmælir í Skarðsheiðinni í 480 metra hæð á stað sem kallast Miðfitjahóll.  Þarna fer raflína hæst, svokölluð Vatnshamralína og hafði Landsnet forgöngu um  þessa veðurathugunarstöð.

Í SA-rokinu snemma á mánudag (25. janúar) mældi þessi nýi mælir mjög snarpar vindhviður og klárlega þær mestu sem fram komu á mælum í þessu óveðri.  Eins og sjá má á línuritinu fór í rúmlega 70 m/s í mestu vindhviðum og engin ástæða er til að ætla annað en mælingin sé rétt.  Það er vitað af miklu vindálagi á línuna á þessum slóðum einmitt í  SA- og A-stormum.  Landsnet geri þetta að umtalsefni í frétt og segir að truflun hafi orðið í þann mund sem mesta vindhviðan kom fram á mæli.  Þrátt fyrir útslag gekk vel að slá línuna aftur inn frá stjórnstöð.

Fróðlegt verður að fylgjast með þessum nýja mæli í Skarðsheiðinni. Í það minnsta lofar hann "góðu". Mælingarnar eru aðgengilegar á síðu Veðurstofunnar innan um alla hina mælana. 

Spenna Vatnshamralínu er 132 kV og þaðan sem hún liggur frá tengivirki Landsnets á Brennimel í Hvalfirði yfir Skarðsheiði, og niður í Vatnshamra í Borgarfirði (og þaðan áfram norður í land um ofanverðan Borgarfjörð).  Línan var tekin í notkun 1977 og samanstendur að mestu af tréstæðum, en 10 stálturnar eru nærri Miðfitjahól þar sem hún liggur hæst. 

Vatnshamralína er mikilvægur hlekkur í Byggðalínunni, eða hringtengingunni um landið. Línan tengir Blönduvirkjun við framleiðsluna á Þjórsár- og Tungnársvæðinu og skiptir miklu fyrir flutning raforku út á  Snæfellsnes og vestur á Vestfirði.

   

Athugasemdir

[Pálmi Freyr Óskarsson, 27.1.2010 kl. 18:49]

Það snjóar í Danmörku.

[Pálmi Freyr Óskarsson, 27.1.2010 kl. 19:57]

Eftir erfiða leit af þessari nýju háloftaveðurstöð, fann ég hana loks hér. Sýnist þessi stöð geta slegið íslenskt vindhraðamet í framtíðinni.

Þetta hefur verið mjög ótrúlegt veður, að vindhviða/vindhviður hafa farið yfir 50 m/s. og mest upp í 72 m/s. þegar 10 mín. meðalvindur var bara 20 - 25 m/s.

Ef þetta reynist rétt mæling þá er mjög stutt í vindhviðuheimsmetið sem er 113,2 m/s.

Ég rakst á þessa bloggfærslu íslendings í Danmörku, enn þar snjóar í hörkufrosti.