Skarpir drættir Norðanlands

Hef haldið mig við Eyjafjörð síðustu daga.  Um helgina gekk á með dimmum éljum og mikið bætti á snjóinn þessa daga.  Í gærmorgun var þannig þungfært á götum Akureyrar.

Merkilegt með þessi él norðanlands, þau er ekki auðvelt að greina t.d. á tunglmyndum.  Enda tók maður eftir því þegar birti upp á milli þeirra að þau eru grunn og meira eins og lág- og miðskýjabakki umvefji fjöllin og úr þessu getur snjóað einhver lifandi bísn.  Með öðrum orðum hagar þessi éljagangur sér samfara NA-átt með nokkuð öðrum hætti norðanlands, en útsynningsélin syðra sem vissulega er  líka af hafi.  Þvingað uppstreymi við fjöll á klárlega mikinn þátt í framköllun úrkomunnar fyrir norðan. 

Það var því hálfgerð opinberun að koma úr fannferginu við Akureyri og í Öxnadalnum vestur yfir heiðina og niður í Skagafjörð þar sem nánast er snjólaust og allir vegir nánast auðir.  Svipað má segja um Húnaþing, þó mér hafi nú fundist heldur meiri snjór við Hrútafjörðinn, en austar.  Í NA-átt veita hin háu fjöll Tröllaskagans ágætt úrkomuvar, en þó miklu síður utar, þ.e. út í Fljótum.

Myndin sem hér fylgir er tekin úr vefmyndavél frá því um kl. 11 í morgun og er henni beint yfir hús Menntaskólans á Akureyri.  Hún er fengin af síðu Sjómannafélags Eyjafjarðar. 

Athugasemdir

[Máni (IP-tala skráð) 22.2.2010 kl. 15:34]

Vantar ekki veðurratsjá í Grímsey, svipaða þeirri og er á Miðnesheiði?

Drægni hennar næði austur og vestur fyrir land, þannig að sjá mætti betur éljaklakka og skil komandi úr norðri.

Mundi einnig gagnast við snjóflóðavöktun, vegna nákvæmari greiningar á úrkomu, ekki satt? Var ekki úrkomugreining einn af veiku punktunum sem komu í ljós í öðru hvoru stóra snjóflóðinu hér um árið?

[Jón Karlsson (IP-tala skráð) 22.2.2010 kl. 20:33]

Einar, sæll.

Þú kemur þarna inná mismuninn á veðri norðnalands; hvort heldur er á eystri hluta þess eða vestari. Fyrir okkur hér á vestari hlutanum, sem stundum þurfum að bregða okkur bæjarleið t.d. til Akureryar,  eru það ekki miklar fréttir að skipti um veðurfar við Öxnadalsheiði. Þetta þekkjum við vel. Tröllaskaginn tekur til sín ákveðið na. veðurfar og hleypir því ekki lengra.

Hér síðustu daga hefur verið na. átt og mikilúðlegur bakki yfir utanverðum Skagafirði, en varla fallið snjókorn á Sauðárkróki. Hafa þó verið éljaklakkar "út að austan" og yfir Tröllaskaga. Horfandi á þessi veðurskilyrði finnst mér að megi lesa að austan skagans sé nánast samfelld úrkoma. En þegar vindur snýst e.t.v. meira til n. og nv. má búast við meiri vindi og úrkomu hér.

Leiðir þetta svo aftur hugann að veðurfregnum og frásögn fréttamiðla af þeim. Er þar oft talað um eitthvað við "norðurströndina". og að "norðanlands" verði  svona og svona veður. En giska sjaldan kemur fram að á Norðanlandi eru  oft ríkjandi fleiri en eitt veðursvæði.

Þakka þér annars fyrir veðurpistlana þína

kv. JK

[Árni Gunnarsson, 23.2.2010 kl. 23:42]

Rétt, Jón og á allra vitorði hjá okkur vestanvatna að á veturna er snjókoma til lítilla vandræða ef norðanátt er austanstæð og þeim mun minni sem vindur er nær austri. Sama er um vindhæð. Búandi á ysta bæ undir Tindastóli austanverðum fram að þrítugsaldri kynntist ég þessu vel. Þegar norðaustanáttin gekk yfir heyskapartímann á sumrin var algengt að þoka lægi frá Stólsendanum og nokkuð inn á næstu bæi. Á Reykjum var nánast logn og þornaði varla á strái. Innar á Ströndinni færðist vindur í aukana og þar náðist að þurrka hey í norðanbelgingi og sól. Í norðvestanátt var þetta með öðrum brag. Þá mátti heita að illviðri væri án undantekninga og með vindi og úrkomu af verstu gerð.

Ég gerði mér í hugarlund að í norðaustanáttinni myndaðist einhvers konar frákast frá enda fjallsins og í því lægi skýringin því að á þessari 16 km. leið inn á Krók væru margar útgáfur veðurlags samtímis. 

En auðvitað er alþekkt að veðurlag getur verið með ólíkum brag á minni spásvæðum en þeim sem Veðurstofan notar sem megin viðmið daglega.