Næsta skot hér suðvestanlands á morgun

Flest bendir nú til þess að í fyrramálið geri ofanhríð og kóf um suðvestanvert landið.  Þökk því að það skuli vera laugardagur !

Fyrir suðvestan land eru nú að ganga í samkrull heimskautalægð (sem kemur úr norðvestri) og önnur smálægð að venjubundnari gerð.  Þær sameinaðar stefna beint hingað til lands þegar kemur fram á morgundaginn.  Vindáttin verður ASA eða svo og víða 10-15 m/s.  Á Reykjanesi, Höfuðborgarsvæðinu fer að hríða á milli kl. 06 og 09 í fyrramálið og það gæti orðið talsvert kóf.  Eins á Suðurlandi frá því fyrr um morguninn.  Þessu fylgir hlýrra loft og hægt verður að tala um hitaskil.  Í kring um Vík mun hlána um kl. 09 í fyrramálið á þeim slóðum sem og með suðurströndinni verður hitinn um +4°C síðdegis og komin rigning á láglendi.  Hins vegar er allt útlit fyrir að það nái ekki að hlána vestar, a.m.k. ekki fyrsta kastið.  Jafnvel gæti það farið svo að þessi skil lægju meira og minna yfir vestanverðu landinu meira og minna á morgun. 

Myndin er fengin af vef Dundee og er frá kl. 14:38. Heimskautalægðin suðvestur af Reykjanesi er greinileg sem og hitaskilin austar.  Allt stefnir þetta nú til okkar.

 

Athugasemdir

[ÞJÓÐARSÁLIN, 26.2.2010 kl. 16:32]

Sæll Einar!

Ég smellti á myndina til að sjá hana aðeins betur. Lægðin á myndinni er alveg stórkostleg. Ekki bara að hún sé eins og dýr heldur er enginn vandi að sjá hvaða dýr það er. Já, horn, hökutoppur, dindill. nasir, auga, eyra og framfætur teygðir fram. Skyldi nú aldrei vera að Þór sé þarna á ferð, en hann átti víst tvo svona, ef ég man rétt. 

Takk fyrir þessa stórkostlegu mynd.

[Sigurður Þór Guðjónsson, 26.2.2010 kl. 17:42]

Þetta er hreint undur! Hvað er í gangi?

[Ragna Birgisdóttir (IP-tala skráð) 26.2.2010 kl. 18:11]

Þetta er ótrúlegt.

[Börkur Hrólfsson, 26.2.2010 kl. 22:35]

Það leynir sér ekki, þarna er þrumuguðinn á ferð.

Og það gustar af honum !

[Pálmi Freyr Óskarsson, 27.2.2010 kl. 15:48]

Ég er farinn að trúa ykkur að þetta sé þrumuguðinn sem er þarna á ferð.

Það er búið að vera eitt versta þrumu og eldingaveður hér í Vestmannaeyjum frá því kl.14, og núna var einn að koma kl.15:37. Þessu fylgir haglkorn sem eru með þeim stærri hér á bæ.

http://andvari.vedur.is/athuganir/eldingar/vikan_is.html?