Svellkalt á Héraði

Við sem fórum út í slabbið og slydduhraglandann í morgun suðvestanlands í hita nærri +1°C eigum kannski erfitt með að trúa því að á sama tíma var frostið 21 stig á Egilsstaðaflugvelli.  En það var nú engu að síður raunin kl. 09 í morgun.

Norðaustan- og austanlands hefur verið kyrrt og bjart síðustu tvo til þrjá sólarhringana og snævi þakið yfirborðið kólnað rækilega.  Hitahvarf við jörð er staðreynd á Héraði og reyndar víðar til landsins austan- og norðaustantil.  Þannig fór frostið í 23 stig við Mývatn.  Ekki þarf nema tiltölulega hæga gola til að blanda upp loftinu við jörð og við það minnkar frostið til mikilla muna.

Myndin er af Skriðuklaustrií "vetrarbúningi" og fengin af vefnum east.is

Athugasemdir

[Guðmundur (IP-tala skráð) 2.3.2010 kl. 12:50]

sæll mig langar að vita hvort þú hafir upplýsingar um veðurfar í suður sovétríkjunum gömlu td Túrkmenistan og Tadsjikistan

er að gera ritgerð og vantar þetta, sérstaklega um veturna

[Ágúst Marinósson, 2.3.2010 kl. 22:40]

Sæll Einar.  Langar að heyra skoðun þína á því hvort ekki sé ástæða til að senda sjóveðurspá út í sjónvarpi?  Fjöldi skipa er kominn með móttökubúnað fyrir sjónvarp og ekkert í veginum að sjómenn geti tekið á móti sjóveðurspá.  Fyrir þjóð sem á svo mikið undir fiskveiðum hljómar það dálítið einkennilega að ekki skuli vera gerð veðurspá fyrir þá sem þurfa mest á henni að halda.