Veturinn er ekki liðinn !

Nú lítur út fyrir þokkalegt kuldakast fyrir árstímann.  Grænlandshæðin hefur enn og aftur hreiðrað um sig og nær hún að beina til okkar köldu lofti úr norðri.  Reykvíkingar vöknuð upp við frost í morgun og verða nú að venja sig við þá tilveru langt fram í næstu viku.

En í raun kólnar ekki að ráði fyrr en um helgina og frá sunnudegi til þriðjudags eru allar líkur á því að það verði frost um land allt og það talsvert frost til landsins norðan- og austantil. Loftið er svo kalt  að víða verður á mörkunum sunnantil að hitinn komist upp fyrir frostmark yfir miðjan daginn, eða á þeim stöðum þar sem nú þegar er farið að sjást til gróanda.  Þessu N-veðri fylgir hvorki hvass vindur né alvöru hríðarveður, en samt sem áður blástur, 5-13 m/s og ákveðinn éljagangur um landið norðaustanvert.

Kortið er spá frá GFS fyrir mánudag og sýnir m.a. "þykktarlínu" upp á 510 dekametra yfir landinu. Það er sú bláa og köld tungan, eða kaldur loftmassinn kemur úr norðri og norðaustri.  

Samanburður við kuldakafla fyrri ára í lok mars er ekki auðveldur.  Skammvinn og hastarleg hret eru ekki svo óalgeng, en lengri kuldakaflar hafa ekki sýnt sig í lok mars síðustu árin.  Nú ætla ég ekki að spá löngum köldum kafla, en hann mun í það minnsta vara í nokkra daga, spár gera ráð fyrir í það minnsta fram á skírdag (1. apríl).

Hastarlegan frostakafla gerði dagana 27. til 30. mars 1985 sem ekkert slær út síðari árin, nema náttúrulega síðustu dagar í mars og blábyrjun apríl, hafísveturinn 1968, sem þóttu mjög sögulegir sökum frosta.

 

Athugasemdir

[Davíð Pálsson, 25.3.2010 kl. 20:35]

Mér hefur lengi þótt best að sjá fyrir um veður næstu daga með veðurspáriti Veðurstofunnar, sjá hér http://andvari.vedur.is/vedrid/vedursparit.html? en hún hefur ekki virkað síðustu viku eða svo. Hugsanlega hefur slóðinni að henni verið breytt??? Belgingur er einnig ágætur, sjá hér http://www.belgingur.is/ en mér finnst hann síðri og hann nær ekki yfir eins langan tíma.

Annað: Skyldu tún vera viðkvæmari fyrir kali nú þegar bændur hafa sparað áburðargjöf síðustu ár?

Enn annað: Hin baráttuglaða lúpína lætur köld vor ekki setja sig út af laginu. Litlu hefur verið kostað til uppgræðslu á Mýrdalssandi en lúpínan, sem enga áburðargjöf þarf, stendur sig frábærlega þar. Henni, ásamt öllu öðru sem á sandinum er, mun þó skola til hafs þegar Kötlugos verður.