Páskahretið í ár

Allt tal um páskahret þykir mér oftast vera heldur klisjukennt, enda páskarnir á fleygiferð um almanakið á milli ára.

Hinsvegar má segja að norðanlands geysi nú hríðarbylur sem allt eins má kalla páskahret.  Lægðarbóla nálgast mitt Norðurland á morgun úr norð-norð-austri.  Með henni fylgir dimm hríð og allhvass vindur af NV.  Víða takmarkað skyggni og líklega spillist færðin staðbundið til morguns. Fyrir miðjan daginn rofar mikið til, en áfram verður allt að því hvass vindur og skafrenningur. 

Spákortið til hægri af Brunni VÍ sýnir stöðuna ágætlega kl. 06 í fyrramálið, bæði staðsetningu lægðarinnar sem og úrkomuvæðið yfir miðju norðanverðu landinu.  Í það minnsta engin vorveðrátta á landinu sama hvernig á það er litið. 

Athugasemdir

[Sigurður Þór Guðjónsson, 3.4.2010 kl. 09:15]

Tek undir það að tal um páskahret er yfirborðslegt, ekki aðeins vegna breytileika páskanna heldur líka vegna þess að hret eru svo algeng á þeim tíma sem þeir geta verið og koma páskum ekkert við. En mér finnst vafasamt að kalla þessa hríð endilega páskahret og ekki heldur snjókomuna í Reykjavík í gær sem veðurffræðingurinn í sjónvarpinu kallaði  páskahret. Ástæðan er sú að kuldar, sem komu ofan í góð hlýindi, hafa staðið í marga daga og bætt við  snjó fyrir norðan smátt og smátt og sums staðar annars staðar líka. Hretið kom því fyrir nokkrum dögum, það byrjaði ekk í gær eða í dag, og ekki rétt að kalla framhald og tilbrigði við ótvírætt kuldahret út af fyrir sig neitt páskahret. En ég tek undir það að tal um páskahret er hrein vitleysa og menn ættu hreinlega að leggja það niður.