Versta illviðri í S-Englandi frá 1990

Hún leit nú ekki sérlega vinalega út lægðin sem tók að dýpka í fyrradag suður af Nýfundalandi í afar skörpum skilum hitabeltislofts úr suðri og heimskautlofts úr norðvestri, áður en hún tók strikið til austurs með stefnu á Danmörku.  Veðurhamurinn hefur verið langverstur suður af lægðarmiðjunni þar sem þrýstilínurnar hafa verið þéttastar í V og SV-átt.  Takið eftir því að hraði lægðarinnar til austurs eykur enn frekar á vestanáttina sunnan hennar.  Vindur verður því heldur meiri en þrýstilínur gefa til kynna.

Margháttað tjón hefur orðið í Englandi, N-Frakklandi, Niðurlödnum, Þýskalandi og reyndar eru ekki öll kurl komin enn til grafar í þeim efnum því hún lægðin á eftir að herja á Mið-Evrópu í nótt.  Samkvæmt frétt BBC er talið að a.m.k. 25 manns hafi nú þegar látið lífið í veðurofsanum, og hafa langflestir orðið undir fallandi trjám.   Myndin hér að neðan og er frá Hollandi sýnir vel hvað stór og mikil tré sem standa ekki veðurofsann geta verið hættuleg. Sú staðreynd gerir allt björgunarstarf afar erfitt á meðan veðrið er ekki gengið niður.

Ítarleg frétt BBC er hér og nokkrar óveðursmyndir héðan og þaðan má sjá á þessum tengli. 

Athugasemdir

[Kristján Pétursson, 19.1.2007 kl. 20:50]

Áhugavert að fylgjast með útskýringum þínum á veðurfari.Maður verður orðinn hálfgildis veðurfræðingur  að lesa bloggina þína.Kærar þakkir fyrir fróðlega og skemmtilega þætti.

[Gísli (IP-tala skráð) 19.1.2007 kl. 21:07]

Takk fyrir veðurvaktina.  Hvað finnst þér um þessa skýringu á hlýnun jarðar "Global Warming" sem repúblikanar vísa gjarnan til þegar þeir vilja hveða menn eins og Al Gore í kútinn?  Forvitnilegt væri að heyra þína skoðun!

[Gísli (IP-tala skráð) 24.1.2007 kl. 21:13]

Já er það, já.  Takk fyrir fróðlegt og skemmtilegt svar.