Kalt að morgni annars sumardags

Vetur og sumar frusu saman um land allt eins og kunnugt er fremur óalgengt að það geri á landinu öllu. En í dag föstudag, annan dag sumars er ekki síður kalt, frost um land allt kl. 07, nema á Heimaey þar sem var +1°C.  Ekki er hægt að segja að mikil og hvöss N-átt sé þessu samfara, heldur er skýringarinnar að leita til þess að loft af heimskautauppruna hefur verið hér afar nærgönglt undanfarna daga.  Framrás þess hefur lengst af verið hæg og lítil mótstaða í raun frá hlýrra lofti úr suðri.

Köldu lofti af þessir gerð fylgir oftast sólríkt veðurlag og hitasveifla dags og nætur mjög áberandi. Ekki nær þó hitinn allstaðar á landinu að fara upp fyrir frostmark, en víða sunnantil nær sólin að ylja svo að hiti nær allt að 6-7°C. 

En gróðri fer ekkert fram á meðan svo háttar til og norðan- og austantil er nú þannig farið að enn er víða snjór yfir, jörð frosin enda talsvert frost á láglendi eins og sjá má. Fátt er þar enn sem minnir á sumarkomuna, nema kannki koma farfuglana og nýhafin sauburður á einum og einum bæ.

Athugasemdir

[Valgerður Sigurðardóttir, 23.4.2010 kl. 08:51]

Ég hélt að það væri annar dagur sumars :)

[Sigurður Þór Guðjónsson, 23.4.2010 kl. 13:21]

Það er ekki að furða þó menn ruglist í ríminu. Ég sá ekkert athugavert við fyrirsögnina fyrr en athugasemd Valgerðar kom!

[Einar Sveinbjörnsson, 23.4.2010 kl. 17:32]

Segi sama og Sigurður Þór, alveg ósjálfrátt að skrifa vetur þegar þetta kalt er !!

Verður samt lagað :)

ESv

[Eiríkur A. Kristjánsson (IP-tala skráð) 24.4.2010 kl. 23:31]

Ehemm.  Er ekki alltaf verið að tala um alheimshlýnum?

Hér á landi er fátt sem bendir til alheimshlýnunar eins og núna er háttað.