Meira af sumarspá 2010

Sagði frá því í fyrradag að veðurlagsspár gera ráð fyrir að sumarið gæti orðið heldur vætusamara sunnan- og vestanlands, en verið hefur undanfarin ár. Eins að markvert hlýrra verði þetta sumarið en meðaltal segir til um um.  Að þessu sinni er meðaltalið miðað við árin 1981-2005. Miðað við 10,4°C í Reykjavík þessi árin að þá er spáð a.m.k 1°C yfir því meðaltali.

Málið er hins vegar að sé ríkjandi SV- og S-átt eða öllu frekar meira um þær á kostnað hinna algengu vindátta af A eða NA eins og sumarspáin nú bendir til að þá hefur það í för með sér ský og sólarleysi á Suður- og Vesturlandi.  Og jafnvel þó loftmassinn sé af hlýjum uppruna að þá ná þessi hagstæðu einkenni hans ekki niður til yfirborðs. Hlémegin fjalla verður aftur á móti vel milt þegar loftið efra nær niður  s.s. á Norðurlandi eða austantil á landinu.

Með öðrum orðum að þegar spáð er hlýindum suðvestur- og vesturundan (yfir frekar köldum sjónum), þá merkir það slíkt loft hingað komið að loftmassahitinn skilar sér ekki þar sem rakt loftið kemur af hafi.  Það er því alls ekki víst að hiti verði nokkuð yfir meðallagi vestantil( m.a. sökum sólarleysis),  á meðan sumarhitinn gæti orðið sérlega vænn norðan og austantil, þess vegna um 2°C yfir meðallagi, ef við höldum okkur við ríkjandi suðvestanvind.

Þrýstifrávikin nú í grennd við landið eru með gjörólíkum hætti miðað við sem þau voru í fyrra. Þá var gert ráð fyrir að loftþrýstingur yrði hærri yfir Grænlandi og lægri norðaustur og austur af landinu, allt til Bretlandseyja.  Slíkt frávikamunstur er vísbending um fremur þurrar N -og NA áttir, nokkuð sem kom á daginn í fyrrasumar.  Fyrir komandi sumar er hins vegar gerð ráð fyrir lægri loftþrýstingi en venja er til á þessum slóðum, ásamt því að hann verður á réttu róli suður- og suðausturundan. Það hefur í för með sér suðvestanvind á norðanverðu Atlandshafinu og ekki síst þá norðlægari lægðarbraut, þ.e. nær okkar slóðum og ekki ólíklega hér vesturundan.

Hér eru tvær myndir.  Annars vegar spá IRI um hitafrávik.  Þar sést vel að talsverðar líkur eru á því að hiti á okkar slóðum verði í efst þriðjungi og meiri en að hitinn verði nærri meðallagi, svo ekki sé talað um að hann verði undir því.  

Hin myndin sýnir frávik sjávarhita á jörðinni a fjögurra vikna tímabili og endar 10. apríl sl. Á Atlantshafi sést vel hvað sjórinn er talsvert hlýrri fyrir sunnan og suðvestan Hvarf á Grænlandi og neikvætt frávik teygir sig frá Mexíkóflóa til ANA langleiðina yfir Atlantshafið. Þessi hitafrávik eru afleiðing af nokkuð óvenjulegri veðráttu liðins vetrar.  Verði þessi frávik sjávarhita í grunninn áfram í sumar, má gera ráð fyrir að veðurkerfin taki mikið til mið af þessum frávikum.  Asoreyjahæðin gæti orðið vestar en venjulega á Atlantshafinu og ekki ólíklega líka norðar.  Eins er samkvæmt þessu hlýrra í sjónum enn sunnar, þ.a úti af Afríkuströndum.  Slíkt ýtir frekar undir myndun hitabeltisstorma og fellibylja á Atlantshafinu en fleira þarf vissulega til í þeim efnum. 

 

Athugasemdir

[Sigurður Þór Guðjónsson, 23.5.2010 kl. 21:07]

Loksins kemur þá rigningarsumarið sem ég er búinn að spá í mörg ár!

[Rafn Haraldur Sigurðsson (IP-tala skráð) 24.5.2010 kl. 00:38]

Vona að þetta verði ekki eins og rigningarsumarið mikla þegar að Þórbergur fékk sumarvinnu hjá Ástu málara við útimálningu og það vildi bara ekki stytta upp. Og ef svo verður raunin, þá vona ég bara að það rigni nóg til að skola helvítis öskunni  við Eyjafjallajökul til sjávar. Annað var það nú ekki.

[Ari (IP-tala skráð) 25.5.2010 kl. 01:42]

tjaaa... það er allavega spáð sól út vikuna á SV horninu :)

[Jóhann (IP-tala skráð) 25.5.2010 kl. 08:37]

Enn ein kjaftæðisspáin :Þ

[Þuríður (IP-tala skráð) 25.5.2010 kl. 10:46]

Hitafrávik frá Mexícóflóa til Miðjarðarhafs!  Er það ávísun á að Golfstraumurinn þar sé kaldari en síðustu ár og hér muni kólna eftir eitt eða tvö ár?

[Þorkell Guðbrands (IP-tala skráð) 25.5.2010 kl. 13:34]

Jamm. Spár eru og verða spár, hvað allir athugi! Reyndar gæti rigningartíð í einhverjar tvær til þrjár vikur um sunnanvert landið komið sér vel varðandi alla öskuna úr honum Eyva! Flúorið er vel vatnsleysanlegt og askan myndi vafalaust hverfa fljótar ofan í jörðina ef rigndi vel og duglega, þótt á sumum svæðum þurfi meira til að koma.

[Sigurður Þór Guðjónsson, 25.5.2010 kl. 14:43]

Gömlu sunnlensku rigningarsumrin stóðu oft frá því í júní til september. En slíkt sumar hefur ekki komið í meira en aldarfjórðung.

[Emil Hannes Valgeirsson, 26.5.2010 kl. 10:30]

Breska veðurstofan virðist nú líka gefa út langtímaspá en á nýrri slóð og með ýmsum nýjum fítusum:
http://www.metoffice.gov.uk/science/specialist/seasonal/category/

… og þeir spá líka vætutíð suðvestanlands.

[Guðmundur Rafnkell Gíslason, 26.5.2010 kl. 22:37]

Mér líst vel á þetta Einar!

[Hermann (IP-tala skráð) 28.5.2010 kl. 14:25]

Hræðilegar fréttir.

Afskaplega leiðinlegt ef þessir 3 hlýu góðu mánuðir sem við fáum á ári verða blautir :(

Þetta hvetur mann þó kannski bara til að halda sig á norður og austurlandi í sumar.