Öskumóða á morgun

Í nótt og fyrramálið er spáð ákveðnum strekkingi af SA og A syðst á landinu.  Eftir þurrkatíð síðustu daga þarf eins og af líkum lætur ekki nema smávægilegan vind til að þyrla upp öskumorinu.  Á miðvikudaginn síðasta (26. maí) var N-átt, dálítil gola, en vart meiri vindur en það.  Engu að síður lagði dimma öskumóðu yfir sveit Eyjafjalla og á haf út eins og sjá má á tunglmynd þennan sama dag úr safni Ingibjargar Jónsdóttur á Jarðvísindastofnun. 

Spáð er 10-12 m/s og um 15 m/s í hæð jökulsins. Ekki fer að rigna ef af líkum lætur fyrr er þegar líður á daginn.  Við þessar aðstæður má því gera ráð fyrir dimmri öskumóðu í nótt, en einkum þó í fyrramálið og fram yfir hádegi. Mun hún berast til norðvesturs yfir lágsveitir Suðurlands og ekki ósennilega áfram í áttina yfir sunnanverðan Faxaflóa, þ.e. Höfuðborgarsvæðið og þar í grennd.   Spákortið að neðan sýnir vinda á Suðrurlandi á morgun kl. 12 (HRAS 3km 30050600 +30t).

 

 Annars er næstu daga er spáð fremur vætusömu veðri sunnanlands, þannig að vonandi verður friður fyrir þessum ófögnuði að mestu eftir morgundaginn, a.m.k. í bili. 

Athugasemdir

[Ari (IP-tala skráð) 31.5.2010 kl. 00:57]

Ættingjar mínir voru að koma úr sumarbústað í dag(gær) í Skeiða-og Gnúpverjahreppi, sögðu öskumóðu hafa komið síðdegis þar, alveg ógeðslega.

Hvenær hverfur þessi aska, fer hún kannski niður í svörðinn og út á haf með tímanum. Ef það kemur þurrkur aftur eftir vætutíð í sumar, má vænta leiðindaöskumóðutíð áfram?

[Jóhann Grétar Kröyer Gizurarson (IP-tala skráð) 31.5.2010 kl. 09:54]

Ekki byrjar þetta "rigningarsumar" vel, með tveimur léttskýjuðum dögum spáðum í Reykjavík í þessari viku, og þurrki meira og minna, eða eins og sagt var í veðurfréttum í gær, lítilsháttar úrkomu. Ég held að þeir sem smíðuðu spálíkönin ættu að hætta þessari tímaeyðslu. Það er ENGINN leið að spá 3 mánuði fram í tímann með einhverri vissu sem skiptir máli. 

[Einar Sveinbjörnsson, 31.5.2010 kl. 10:29]

Jóhann !

Förum varlega í að tala um rigningarsumar, þó svo að veðurlagsspárnar geri ráð fyrir því að úrkoma verði líklega yfir meðallagi þessa þrjá mánuði sunnanlands og vestan í heildina tekið.  En það þarf ekki endilega að vera tímaeyðsla að velta vöngum yfir veðurlagi næstu þriggja mánaða.  Sýnt hefur verið fram á að forsendur í umhverfinu eru til staðar til að byggja á sem grunn fyrir slíkar veðurlagsspár.  En líkt og aðrar veðurspár ganga þær ekki alltaf eftir !   En það er rétt hjá þér í grunninn að engin leið er til þess að spá 3 mánuði fram í tímann með einhverri vissu.  Ekki treysti ég mér þannig með nokkru móti að spá hvernig veðrið verður þriðjudaginn 31. ágúst.  En munurinn á aðferð og túlkun veðurlagsspáa sem horfa til tíðarfars fyrir lengra tímabil er allt önnur en þessi við daglegu veðurspárnar.  Við vitum öll að nákvæma kotlagningu breytileika veðursins á hverjum stað er hægt að segja fyrir um kannski næstu 5 til 7 daga og stundum mun skemur og þá vart til næsta dags.

ESv

[Jóhann Grétar Kröyer Gizurarson (IP-tala skráð) 31.5.2010 kl. 12:20]

Takk fyrir skjótt svar Einar!

Já, ég hefði kannski ekki átt að draga svo djúp í árina að tala um rigningarsumar, ég tek það tilbaka.

Kveðja,

Jóhann