Langur snjóavetur í Svíþjóð

Sænska veðurstofan (SMHI) birti fyrir skemmstu yfirlit um snjóhulu og samfellda alhvíta jörð nýliðinn vetur. Eftir því var tekið hvað snjórinn var þrálátur og sem dæmi má taka Stokkhólm, en þar var snjór yfir samfellt frá 15. des til 29. mars. 

Í landmæraþorpinu Storlien beint austur af Þrándheimi er jörð alveg nýverið orðin auð.  Þar taldist fyrst alhvítt 29. september, en autt varð ekki fyrr en 3. júní.  Þetta gerir 247 dagar með samfelldum snjó og aldrei áður í tæplega 60 ára sögu veðurathugana og snjómælinga þarna hafa menn séð viðlíka.  Reyndar hafa oft verið meiri snjóþyngsli að vetrinum, þ.e. fannfergi, en kalt vorið átti sinn þátt í því að draga leysinguna fram á sumar.

Storlien er í 600 m hæð ekki langt frá skíðaparadísinni Are.  Í Storlien er reyndar ágætis skíðasvæði og fer engum sögum af því hvort það sé jafnvel ennþá opið !  Sænska konungsfjölskylda ku eiga hús í Storlien og halda Karl og Sylvía sig til þar um páska ásamt sínu ágæta slekti.  Þessi bær var áður þekktur sem mikilvæg lestarstöð, þaðan sem leiðir kvíslast í allar áttir, ekki síst til kaupskipahafnar í Þrándheimi.

Athugasemdir

[Ágúst H Bjarnason, 10.6.2010 kl. 08:59]

Snjórinn á norðurhveli virðist hafa verið í meira lagi síðastliðinn vetur samkvæmt þessari mynd frá Rutgers háskóla. Ekki verið meiri snjór síðan 1978 sýnist mér.

http://climate.rutgers.edu/snowcover/chart_seasonal.php?ui_set=nhland&ui_season=1

Sjá einnig:

http://www.climate4you.com/SnowCover.htm#NH%20seasonal%20snow%20cover%20since%201966

 

[Einar Sveinbjörnsson, 10.6.2010 kl. 09:45]

Athyglisverð samantekt Ágúst !  Finnst þó þrátt fyrir allt ekki vera mikill breytileiki á milli ára eða frá um 41 millj. ferk. (1981) í um 48 millj. ferkm.  Í tenglinum sem þú vísar til er sams konar rit fyrir vorið og þar er að sjá mun meiri sveiflur og reyndar ákveðna tilhneigingu eða leitni síðustu tvo áratugi eða svo.  Annars eru upplýsingar um snjóhulu á óbyggðum svæðum óáreiðanlegar fyrir tíma veðurtunglanna en þeirra hefur notið við frá því um 1980.

ESv

[Ágúst H Bjarnason, 10.6.2010 kl. 14:55]

Það er einn galli á þessu súluriti að lóðrétti skalinn nær frá 40 til 49 en byrjar ekki við núll. Það ýkir verulega breytileikann. Maður lætur auðveldlega platast.

Lóðrétti ásinn ætti frekar að vera kvarðaður t.d. 0 til 50 (milljón km2). Þá kæmi raunverulegur breytileiki betur fram.

Svona sér maður allt of oft framsetningu gagna.  Ég vil heldur sjá ásana byrja við núll