Ísinn enn nærri þrátt fyrir hagstæðar vindáttir

Á meðfylgjandi mynd frá Jarðvísindastofnun HÍ frá því í gær má sjá að hafísinn er ekki svo langt undan Horni og úti fyrir Húnaflóa.  Síðustu dagana eða frá 22. til 23. júní hafa verið á svæðinu hagstæðir NA- og A-vindar, sem venjulega halda ísnum frá.  Svo er að sjá sem að hann haldi sér ágætlega þessa dagana hvað svo sem síðar verður. 

Þetta eru ekki nema um 30 mílur í jaðarinn úti af Kögri og jafngott að SV-átt láti ekki á sér kræla úti á Grænlandssundi við þessar aðstæður.  Reyndar er ekki annað að sjá en að heldur herði á NA-áttinni næstu daga og hafísjaðarinn ætti því að fjarlægjast.

 

Athugasemdir

[Gullvagninn (IP-tala skráð) 28.6.2010 kl. 09:49]

átti þetta ekki allt að vera bráðnað?

[Þorkell Guðbrands (IP-tala skráð) 28.6.2010 kl. 10:20]

Þessi tunga er í flestum árum býsna þrálát og eins og Einar getur um, þá er SV-átt til stórrar bölvunar og getur flutt ísinn á óhentugt svæði. Svo er það líka áhrifaríkur þáttur varðandi veðurfar á Hornströndum og hér á Húnaflóasvæðinu að bráðnun þessarar ístungu leiðir af sér að á yfirborðinu flýtur lag af bræðsluvatni, tiltölulega seltulitlu, sem blandast fremur hægt við seltumeiri og hlyrri sjó sem er undir því. Það hefur í för með sér að þegar hlýtt loft berst að úr austri, myndast gjarnan þokubakkar, sem berast svo inn á land í hafgolunni.