Lægð nr.2 á miðsumri

Sjaldan er ein báran stök, því nú er önnur djúpa lægðin á innan viku á leið upp að suðurströnd landsins.

Hún kemur ekki eins upp að landinu og sú fyrri.  Vindáttin verður meira NA-læg í stað A-áttarinnar sem var einkennandi í fyrra skiptið. Víða hvessir í nótt og ekki síður á morgun þegar vindur verður orðinn alveg NA-stæður og lægðinni spáð hér skammt suðaustur af landinu.  

 

Spá um veðurhæð og vindhviður:

Undir Eyjafjöllum (einkum austurfjöllunum, hjá Steinum og austur fyrir Skóga).  Hviður allt að 35 m/s frá því um kl. 20 í kvöld og til kl. 05-06 í fyrramálið

Ekki útséð með að rigninguna þarna staðbundið, sandfok og öskufjúk líklegt frá Markarfljóti og austur í Mýrdal, sérstaklega þegar líður á daginn.

Öræfasveit frá Skaftafelli út á Fagurhólsmýri:

NA-átt, hviður allt að 40 m/s frá því um kl. 19-21 til kl. 03 í nótt.

Líklega einnig hviðuástand við Lómagnúp á sama tíma.

Hvessir í nótt og á morgun um vestanvert landið í NA-átt.   Hviðuástandi (a.m.k. 35 m/s) er spáð á stöðum sem allir eru þekktir fyrir byljóttan vind við þessar aðstæður.

Á sunnanverðu Snæfellsnesi:  Við Hafursfell á sunnanverðu Snæfellsnesi (bíll fauk þar 1. júlí) frá því um kl. 22-24 í kvöld.

Í Staðarsveit og eins utan gatnamóta Fróðárheiðar (Klifhraun og Stapafell) frá því í nótt og á morgun.

Seint í nótt og á morgun á norðanverðum Svínadal niður í Saurbæ og við Gillastaðamela í Reykhólasveit svo nefndir séu staðir við innanverðan Breiðafjörð þar sem hviður ná sér á strik í þessari átt.

Litlu má muna að hviðuveður verði einnig á Kjalarnesi við þessar aðstæður, mjög sennilega 25-30 m/s þar í hviðum frá því seint í nótt.

Læt þessa upptalningu duga í bil, en margt fleira væri hægt að skrifa um þessa væntanlegu lægð og það veður sem henni fylgir ef mark er takandi á spánum. 

(myndin er úr safni mbl.is og sýnir brak utan vegar eftir foktjón)

 

Athugasemdir

[Sigurður Þór Guðjónsson, 6.7.2010 kl. 22:34]

Það ætlar sem sagt að verða skítaveður það sem eftir er sumars!

[Þorkell Guðbrands (IP-tala skráð) 6.7.2010 kl. 22:38]

Allavega lítur út fyrir að vindar liggi í NA - áttum það sem eftir lifir júlímánaðar, Sigurður, skv. langtímaspám. Skársta veðrið verður líklega í kringum höfuðborgina, kannski líka í Borgarfirði.