Víða enn leiðinlega hvasst á landinu

Syðst á landinu náði veðrið hámarki í nótt, en laust fyrir kl. 3 sló vindmælirinn í 45 m/s í hviðu á Steinum undir Eyjafjöllum.  Miðað við vindmælingar á Stórhöfða sem oft er ágætt að hafa til viðmiðunar þegar A-veður eru borin saman og styrkur þeirra metin, að þá var veðurhæð nú tiltakanlega minni en 1. júlí.  Þó verður að hafa í huga að nú ber veðrið öll merki NA-áttar fremur en A-áttar.

Kl. 06 var lægðin 971 hPa suðaustur af landinu.  Svona alvöru lægðir á miðju sumri eru næsta fátíðar og í raun sérstakt rannsóknarefni hvað veldur að fá tvær slíkar í syrpu, sérstaklega þegar horft er til þess að raunverulega svalt pólarloft er ekki til staðar sem byggingarefni þeirra ef svo má komast að orði. 

En nú laust fyrir kl. 09:30 má sjá að enn er leiðinlega hvasst víða á landinu og veðurhæðin sums staðar til trafala ferðalöngum.  Athyglisvert er m.a. að sjá að í Skaftafelli hefur vindur verið fremur hvass og byljóttur nú í morgun og slegið í 26 m/s.  Vonandi að allt hafi gengið vel á tjaldstæðinu þar.  Á Sunnanverðu Snæfellsnesi er líka víða ansi vindasamt og nú rétt áðan sló mælir Vegagerðarinnar á Kjalarnesi í 35 m/s í mestu hviðu.  Þar er því varhugavert að vera á ferðinni nú með aftanívagna.

Lægðin verður á dóli hér undan Suðausturlandi næsta sólarhringinn og rúmlega það og viðheldur hér NA-strengnum og helst hann því lengur en góðu hófi gegnir nú í júlí. Um norðvestanvert landið alveg til morguns.  

Athugasemdir

[Eysteinn Þór Kristinsson, 7.7.2010 kl. 10:18]

... og enn bíðum við austfirðingar eftir SV-áttinni sem átti að vera ríkjandi í allt sumar

[Einar Sveinbjörnsson, 7.7.2010 kl. 10:59]

Þú færð í það minnsta ekki SV-áttina þessa vikuna Eysteinn.  Mikið hefur rignt fyrir austan síðustu dag og sýnist mér að úrkoman á Fáskrúðsfirði sé orðiðn um 250 mm frá því að gáttirnar opnuðust 1. og 2. júlí !

ESv

[Sigurður Þór Guðjónsson, 7.7.2010 kl. 14:13]

Ég hef ekkert vit á veðri en mér finnst allur sumarfílingur, sem var svo sterkur síðan einhvern tíma í maí, hafa horfið með fyrri lægðinni 1. júlí. Það er hryllingur að horfa til Esjunnar hér út um gluggann. Minnir mann swinging sixties! Ég er líka að pæla í hvað sé í gangi og við hverju megi fara að búast. Það er mín reynsla, byggð á kannski skeikulu minni, að þegar mikill rosi kemur skyndilega með látum eftir langvarandi góðviðri um hásumar, hvað þá eitt ofan í annað, þá nái sumarið sér aldrei aftur almennilega á strik. Að þetta gerist akkúrat í byrjun venjulega besta sumarmánaðarins er virkilega ills viti.

[Sigurður Þór Guðjónsson, 7.7.2010 kl. 14:40]

Það er núna 11 stiga hiti á nyrstu og næst nyrstu veðurstöð heimsins!

[Hermann (IP-tala skráð) 7.7.2010 kl. 21:04]

Er þetta það sem koma skal?

Er þetta kannski eðlilegt íslenskt sumar?

Voru seinustu sumur óeðlileg?

Spyr sá sem langar í smá sól, en fær ekki.