Eyrarbakki með 20,8°C

Hve oft enda ekki spár að sumrin með frasanum...,hlýjast inn til landsins eða hlýjast í uppsveitum.  Það átti þó ekki við í dag þar sem hlýjast varð við sjávarsíðuna á Suðurlandi.  Eyrarbakki trónir á toppnum í dag með 20,8°C og þar á eftir Þykkvibær með 20,4°C einnig við sjóinn.  Reyndar ásamt Árnesi í Gnúpverjahreppi sem er þessi dæmigerða uppsveitastöð.

Það verður frekar á þessum dæmigerðu hafgoludögum sem það á við á hlýjast verði í uppsveitum.  Í dag var nægjanlegur NA-vindur sem dugði til að halda aftur af hafgolunni.  Meira en það því þegar loftið náði til Eyrarbakka hafði það leikið um sólbakað Suðurlandið. 

Þetta sér maður stundum að sumrinu, en enn frekar að haustinu þegar sólfarsvindurinn lætur undan síga. 

Athugasemdir

[Sigurður Þór Guðjónsson, 16.7.2010 kl. 22:56]

Það vqr nú líka kominn tími til að mældist einvhers staðar 20 stig á kvikasilfri en það gerðist í dag á Eyrarbakka í fyrsta sinn i sumar. 

[Einar Sveinbjörnsson, 16.7.2010 kl. 23:05]

Hefurðu fylgst grannt með þessu Sigurður Þór ? Er þetta virkilega fyrsta mælingin yfir 20°C með hefðbundnum mæli.  Hvað með Torfur í Eyjafirði  fyrr í sumar ?

ESv

[Sigurður Þór Guðjónsson, 16.7.2010 kl. 23:21]

Ég ætlaði nú reyndar að skrifa í júlí en 20 stig mældust þrjá daga í júní. En þessi júlí hefur verið svo einkennilega leiðinlegur eftir að ''fyrsta haustlægðin'' kom. Þetta eru fyrstu 20 stigin í júlí sem nú er hálfnaður.

[Jón Kristófer Arnarson, 17.7.2010 kl. 01:32]

Ég bý í Tjarnarbyggð rétt ofan við Eyrarbakka eða milli Eyrarbakka og Selfoss.  Ég keyrði þaðan og á Selfoss uppúr fjögur sem var sennilega um svipað leiti og hiti fór hæst á Eyrarbakka.  Minn óopinberi hitamælir í bílnum sýndi þá einmitt 21 gráðu þegar ég var kominn á sæmilega ferð á Eyrarbakkaveginum.  Þegar ég nálgaðist Selfoss var hins vegar kominn 22 stiga hiti svo kannski hefur hitinn verið einna hæstur þar í dag?

Það er annars merkilegt að veðurathuganir skulu ekki vera á Selfossi sem er stærsti þéttbýliskjarninn á Suðurlandi.

[Sigurður Þór Guðjónsson, 17.7.2010 kl. 09:28]

Tek undir þetta með veðurathuganirnar á Selfossi. Annars gæti Bæjarfélagið keypt sjálfvirka stöð og staðið undir henni þó hún yrði í umsjá Veðurstofunnar. En bæjarfélög eru flest skilningssljó á veður. Á Flúðum kom upp hugmynd að setja upp veðrstöð en strandaði á því að hreppurinn tímdi ekki að standa undir kostnaðinum.

[Sigurður Þór Guðjónsson, 17.7.2010 kl. 09:32]

Annar staður á suðurlandi þar sem sárlega vantar veðurstöð er við Laugarvatn sem er vinsæll ferðamannastsaður.

[Sigurður Þór Guðjónsson, 17.7.2010 kl. 09:49]

Það er kannski eins gott að hugsa aðeins áður en menn gera athugasemdir. Hiti komst í 20 í júní á hefðbundinni veðurstöð í fimm daga en ekki þrjá, þar á meðal einu sinni á suðurlandi og einu sinni í Borgarfirði.

[Þór Gunnlaugsson (IP-tala skráð) 17.7.2010 kl. 10:34]

Sumarið 2011 verður enn heitara en þetta ekki bara hér á landi heldur um allan heim.

Viðvörun var í gær í Mílano þar sem hitinn var um hádegi 40.6c og búist við að hann gæti farið í 43c nú um helgina en heitasti timinn er eftir.Almannavarnir þar voru virkjaðar vegna hitans.