Litla Skarð í Borgarfirði

Í samantekt gærdagsins um hæsta hitann trónaði eins og svo oft áður Þingvellir á toppnum með 24,1°C. Borgarfjarðarstöðvarnar, Húsafell, Hvanneyri og Stafholtsey fóru allar í tæpar 22 gráður.  Þar sem ég var staddur skammt frá orlofsbyggðinni í Munaðarnesi var hitinn svo að segja kæfandi um miðjan daginn í gær og ekki hafgola eins og neðar í héraðinu. Hefðbundinn gluggamælir á norðurhlið húss fór um tíma upp í 26°C, en hann sýnir eins og títt er um slíka mæla ívið of hátt gildi við þessi skilyrði. Geislun frá dökkum við hússins hefur þar mest að segja.

Mér var þá hugsað til Litla Skarðs hérna skammt norðurundan.  Þar er mælistöð, en í hana eru ekki sóttar upplýsingar nema tvisvar á sólarhring.  Litla Skarð er engin venjuleg veðurathugunarstöð.  Hún er hluti samhæfðrar umhverfisvöktunar sem staðið hefur yfir frá 1996. Vöktunin felur í sér að fylgst er með ýmsum eðlis-, efna- og líffræðilegum þáttum yfir ákveðið tímabil. Þetta er norrænt verkefni og ýmsar stofnanir koma að þessari vöktun auk Veðurstofu Íslands (sjá nánar hér). 

Eitt sinni gekk ég að þessum mælireit fyrir tilviljun. Hann er utan alfararleiðar, nokkru ofan við Vesturlandsvegi í landi Litla Skarðs í Stafholtstungum í um 115 metra hæð.  Mælingasvæðið er í kjarrivöxnu landi og lætur lítið yfir sér.

En ég sé í dag að hitinn í Litla Skarði hefur náð rúmum 23°C á milli kl. 16 og 17 í gær og þannig átt að verða í 2. eða 3. sæti þeirra stöðvar sem hæstan hitann mældu.