Sumarið komið norður ?

Ánægjulegt var að sjá í morgun að á Bergstöðum við Sauðárkrók var komin SV-gola, létt hafði til og hitinn nálgaðist óðfluga 20 stigin.  Svipað í Húnaþingi og norður í Eyjafjörð.  Þar austanvið hafði SV-þeyrinn enn ekki kl. 09 náð að láta til sín taka.  

Þetta eru verulega góð tíðindi fyrir Norðlendinga, en umbreytingin yfir í góða tíð, er aðeins hikstandi, því fyrir norðan land leynist lægðarbóla, sem skýst í dag til suðausturs og beinir í kvöld aftur lofti úr norðri.  Það verður þó að mestu án úrkomu, en svalinn fylgir því engu að síður.  Meðfylgjandi spákort (HIRLAM) af Brunni Veðurstofunnar sýnir þetta vel kl. 21 í kvöld.

En seinni partinn á morgun og ekki síðar en á fimmtudag er von á "þykkum" og ekta suðvestanloftstraumi og þá hlýnar varanlega og birtir upp norðanlands og austan !

Athugasemdir

[Sigurður Þór Guðjónsson, 20.7.2010 kl. 15:32]

Þetta varð nú skammvinnt. Fyrir kl. 11 hafði hitinn komist yfir 20 stig á Sauðárkróksflugvelli en núna kl. 15 var kominn sterk hafgola með aðeins 10-11 stiga hita. 

[Baldur Helgi Benjamínsson (IP-tala skráð) 22.7.2010 kl. 10:11]

Það er nú rétt að benda á að sumarið kom í júní hér fyrir norðan  256 sólskinstímar og 11,2 gr. meðalhiti bera því glöggt vitni. Það stefnir í hlýjan dag hér norðan heiða, hitinn kominn í 16,5 stig frammi í firði kl. 10 að morgni. Einnig hefur nóttin verið hlý, lægst hefur hitinn á Torfum farið í 11,2 gr kl 5 í morgun.

[Sigurður Þór Guðjónsson, 22.7.2010 kl. 11:03]

Það er alveg rétt að júní var mjög góður fyrir norðan en óneitanlega hefur orðið þar nokkuð bakslag það sem af er júli.