Hitamet í Moskvu

Hitabylgjan í Rússlandi að undanförnu ætlar ekki að gera það endasleppt.  Í gær mældust þannig 37,4°C í Moskvu sem er hæsti hiti sem þar hefur mælst nokkru sinni.  Eldra metið er frá 1920.

Ég er eiginlega meira hissa á því að hitametið í Moskvu skuli ekki vera hærra, þar sem borgin liggur langt inn í landi, óravegu frá hafi. Hitamet Danmerkur er þannig 36,4°C (Holsterbro, 1975) og 38,5°C í Englandi (Faversham í Kent, 2003).

Því er spáð að hitinn gæti mælst enn hærri í Moskvu í dag og á morgun.  Sunnar í landinu er algerlega kæfandi hiti.  Í Volgograd (fyrrum Stalíngrad) er gert ráð fyrir því að hitinn verði um og yfir 40°C á morgun.

Ég segi nú bara, guði sé lof fyrir hafgoluna !

 

Athugasemdir

[Sigurður Þór Guðjónsson, 27.7.2010 kl. 11:44]

Hitinn hefur verið mestur í Rússlandi í Astrakhan og grennd, suður af Volgograd (þar sem hitinn hefur enn ekki farið í 40°) og í Kalmýkíuhéraði þar suðvestur af, yfir 40 stig suma daga, mest 44° í Jaskul (7 m undir sjávaramáli), sem er nokkuð austur af skákborginni Elista og í Vernhnij Baskuncak 44°. Þessir hitar hafi staðið frá því snemma í júlí en færa sig til, stefna norðvestur með tilliti til hitameta. 

[Gunnar (IP-tala skráð) 27.7.2010 kl. 14:20]

Já, maður tengir Rússland kannski meira við kulda og snjó...en er ekki evrópska hitametið - það er að segja mesti hiti sem mælst hefur í álfunni nokkurn tíma - einmitt af þeim slóðum, nálægt Astrakhan/Elista..?

[Sigurður Þór Guðjónsson, 27.7.2010 kl. 15:01]

Hitamet Evrópu er frá Sevilla á Spáni, 49 stig. Ég held að metið í Astrakhan séu þessi 41 stig sem mældust þar 11.7. Þessi svæði eru furðu norðanlega á hettinum.

[Sigurður Þór Guðjónsson, 27.7.2010 kl. 15:14]

Í Sevilla mældut reyndar slétt 50 stig 4. ágúst 1881 ef eitthvað er að marka það.