Sólarleysi fór með lofthitann í dag

Ég gerði að því skóna fyrir helgi að dagurinn í dag gæti hæglega orðið sá hlýjasti það sem af er sumri og hámarkshiti dagsins jafnvel náð 25 stigum.

Listi Veðurstofunnar eftir daginn er þessi: 

Ásbyrgi	21,9 °C
Húsavík	21,7 °C
Neskaupstaður	21 °C

 

Það kúnstuga við þessar hitatölur er að þær voru allar komnar kl. 10 í morgun.  Með örðum orðum að þá fór dagurinn mjög vel af stað norðaustan- og austanlands, en síðan þykknaði upp með S- og SV-áttinni og víðast rigndi um miðjan daginn.  Þegar sólin náði ekki að skína varð jafnframt ljóst að hitinn færi ekki hærra en þetta.

Enn verður því bið á því fá hitann yfir 25 stig þröskuldinn á landinu á þessu annars mjög eftirminnilega góðviðrissumri. 

Nú eru kuldaskil á leið austur yfir land og hlýja tungan sem verið hefur yfir landinu frá því í gær, brátt úr sögunni.  Þó er ekkert að kólna að ráði, aðeins er að draga úr hlýindunum. 

Athugasemdir

[Þorkell Guðbrands (IP-tala skráð) 15.8.2010 kl. 21:47]

Það er búið að vera nærri 20°C hér í allan dag, en það var vott framan af degi. Var að aka framhjá sundlauginni hérna áðan, þar sem er "opinber" hitamælir Króksara, hann sýndi +19°C, en mælirinn í bílnum hjá okkur sýndi +18°.

[Sigurður Þór Guðjónsson, 15.8.2010 kl. 22:09]

Þetta voru talsverð vonbrigði.

[Rafn Haraldur Sigurðsson (IP-tala skráð) 15.8.2010 kl. 22:43]

Það var allavega hlýtt í jarðböðunum fyrir norðan í dag, en þess utan var háskýjað en gekk svo á með skúrum en birti til seinnipartinn á leiðinni heim þangað til ég kom yfir Holtavörðuheiði, þá var eiginlega leiðinda suddi  og rok og rigninging undir Hafnarfjalli og á Kjalarnesinu.

[Sigurður Þór Guðjónsson, 16.8.2010 kl. 00:31]

þetta er nú samt mjög líklega hlýjasti dagur sumarsins að meðalhita yfir allt landið.