Næturfrost á Suðurlandi

Á yfirliti Veðurstofunnar eftir nóttina fyrir sjálfvirku hitamælana má sjá að lágmarkshitinn fór niður fyrir frostmark á a.m.k. þremur stöðum á Suðurlandi.  Aðra nóttina í röð mældist frost á Þingvöllum eða -0,2°C.  Í Þykkvabænum örlítið meira eða 0,7°C og á svipuðu róli var lægsti hitinn í nótt á Kálfhóli á Skeiðum.  Nú er það svo að hiti er mældur í tveggja metra hæð, en í þeirri sterku útgeislun sem var frá því í gærkvöld í heiðríkjunni og logninu verður talsvert kaldara alveg við jörðu.

Sjálfur lá ég í tjaldvagni við fossinn Faxa í Biskupstungum og ég held ég hafi ekki fyrr átt jafn kalda nótt í tjaldi.  Þó var ég ekki á jörðinni heldur aðeins frá. Var ekki nágu snöggur út í morgun til að sjá hvort hefði hélað. Maður sá svo sem hvað var í vændum í gærkvöldi, því um leið og sólin settist snöggkólnaði.  Sá t.a.m. að í Árnesi í Gnúpverjahreppi að þá féll hitinn út tæpum 11 stigum niður í 1,5°C á tveimur klukkustundum eða frá kl. 20 til kl. 22.  Meðfylgjandi línurit af vef VÍ er sýnir þetta vel.

En mikið óskaflega er nú veðrið fallegt þennan morguninn fyrir austan fjall í Biskupstungunum.  Bara að það verði aðeins meira skýjað næstu nótt til að tempra útgeislun jarðarinnar.  

Athugasemdir

[Ingimundur Kjarval, 28.8.2010 kl. 15:48]

Væri gaman að vita hvernig þetta fellur inn í meðaltal og met. Ég var í sveit á Snæbýli í Skaftártungum sem strákur og ótrúlegt hvað kólnaði fljótt síðsumars. Man eftir að taka upp kartöflur líklega snemma í septemeber, grösin fallin og fingurnir loppnir af kulda.

[Óskar J. Sigurðsson (IP-tala skráð) 28.8.2010 kl. 22:46]

Einstaklega tært loft og gott skyggni síðustu 4 daga.

[Hafdís Ragnarsdottir (IP-tala skráð) 29.8.2010 kl. 13:37]

Við hjónin voru líka í tjaldvagni við Faxa í Biskupstungum aðfaranótt laugardagsins 28. ágúst. Höfðum vit á því að vera vel klædd (lopasokkar og peysur) og fundum ekki fyrir kulda. Vöknuðum nógu snemma til að sjá hrímaðan bílinn.

[Anna Þ. Pálsdóttir (IP-tala skráð) 29.8.2010 kl. 19:59]

Sæll vertu. Ég heyrði sagt nýlega að í kjölfar eldgoss fylgdi harður vetur. Hefur veðurfar verið skoðað sérstaklega með tilliti til þess og er eitthvað til í því. Ef svo er hvað er það við eldgos sem veldur því?

Fyrirfram þakkir.

Anna Þóra

[Einar Sveinbjörnsson, 29.8.2010 kl. 21:23]

Hún var fín seinni nóttin Hafdís, þó hitinn hafi verið kominn ofan í 2 stig fyrir miðnætti.  Síðan þykknaði í lofti og nætursvalinn var bara vel bærilegur.

Síðan er það þetta með eldgosin og áhrif þeirra á veðurfar almennt séð.  Þegar eldgos eru af þeirri stærðargráðu að með þeim berist út í lofthjúpinn annað hvort gífurlegt magn brennisteinsríkra gastegunda eins og raunin verð t.a.m. í hinu stóra Lakagígagosi (Móðuharðindunum) 1783-4 eða þegar fíngerð gosefni berast í töluverðum mæli upp í heiðhvolfið í um 15-20 km hæð.  Hvorugt þessa átti við í Eyjafjallajökulsgosinu. Lítið barst af gosefnum upp í þá hæð og þaðan af síður eru um að ræða að þau hafi breiðst út umhverfis jörðina og tempri þannig inngeislun sólar.  Pinatubo-gosið á Filippseyjum 1991 var einmitt þeirrar gerðar og næstu mánuði á eftir lækkaði meðalhiti  við jörðu þannig að eftir því var tekið. 

ESv