Hitamet á Grænlandi í dag !

Eins og Óskar Sigurðsson bendir á í athugasemd við færsluna um óvenju hlýtt loft yfir landinu að þá er líka hlýtt sums staðar á Grænlandi.  Hann segir að hitinn í dag hafi farið í 23°C í Nuuk.  Á veðurkorti Dönsku Veðurstofunnar yfir Grænland má sjá hitatölur frá því í morgun.  Þá mældist 21,6°C í flugvellinum í Nuuk. 

Danska Veðurstofan, né heldur fjölmiðlar í Danmörku eru ekki farin að fjalla um þessi óvenjulegu hlýindi sem verið hafa í dag langt norður eftir allri vesturströndinni.  Samkvæmt þeirri eigin metatöflu yfir mesta mælda hita í hverjum mánuði er mæling dagsins í Nuuk hitamet fyrir september (a.m.k. frá 1958, en það er upphafsár töflunnar.).  Skráð hitamet september er 21,0°C í Narsarsuaq 1996.

Í nótt og fyrramálið slær síðan til á austurströndinni, við Scoresbysund og þar um slóðir.  Hlýindi loftmassans þar yfir eru með miklum ólíkindum, en niðri í firðinum hefur enn sem komið er ekkert orðið neitt hlýtt. Geri snarpan vind þarna rýkur hitinn hins vegar upp. 

Það verður líka fróðlegt að sjá hvernig hitafarið þróast hér á landi á morgun.  Í dag varð hæstur hiti 23,0°C á Húsavík og áreiðanlega einn allra besti dagurinn þar. Það merkilega er að loftið er enn að hlýna yfir landinu.

 

Viðbót 4. sept.  Dansk Veðurstofan hefur staðfest 24,9°C í Nuuk og þar með glæsilegt hitamet í septmeber, næstum fjórum stigum hærri hiti en eldra met!

Athugasemdir

[Sigurður Þór Guðjónsson, 2.9.2010 kl. 22:23]

 Á flugvellinum við Nuuk fór hitinn í 24,8 stig en 22,8 í bænum.

[Emil Hannes Valgeirsson, 2.9.2010 kl. 23:14]

Það er hálf spælandi að hafa rétt misst af þessu þar sem ég var í Nuuk í roki og rigningu um síðustu helgi og mun svalara veðri.

[Einar Sveinbjörnsson, 3.9.2010 kl. 08:09]

Hefði ekki Emil verið hálf skringilegt að vera á Grænlandi í þessum óvenjulega hita.  Veðrið um síðustu helgina var þó "ekta".

ESv

[Emil Hannes Valgeirsson, 3.9.2010 kl. 09:29]

Jú, það gæti hafa verið skringilegt, nema hvað það er alltaf áhugavert að upplifa ekta óvenjulegheit í veðri.