Fyrsta haustlægðin (II)

Í dag, mánudag hefur allt verið með kyrrum kjörum.  Þó er margt í gangi hér í kringum okkur.  Ágætt er að líta á NOAA tunglmynd sem fengin er frá Dundee  laust eftir hádegi (kl. 13:54).  Á tiltölulega litlu svæði í grennd við landið má bæra með því að skoða skýin grein 3 lægðarmiðjur:

1.  Sú elsta er á Grænlandshafi og skil hennar fóru yfir Ísland í gær og snemma í nótt.  Kjarni hennar er háloftakuldinn og hún hefur hringað um sig skúrabólstra.  Frekar óvenjulegt er að sjá þetta mikil og "þroskuð" skúraský yfir hafi þetta snemma haustsins og er til marks um kulda í hálofunum.  Þessi lægð grynnist og þokast til austurs.

2.  Í skýjabreiðunni norður af landinu er sýnileg sveigja eða krókur norðaustur af Melrakkasléttu.  Þarna er vaxandi lægðarmiðja og þokast hún í suður eða nær landi, rétt eins og skýjabreiðan öll.

3.  Mest er um að vera suðvestur af Færeyjum.  Af myndinni af dæma er mikil gerjun þarna í gangi. Greinilegur vöxtur lægðar. Hlýja og raka loftið er yfir Bretlandseyjum á leið NNA yfir Færeyjar og þar austur af.  Kaldi háloftakjarninn í vestri (lægð nr. 1) fóðrar vitanlega þessa lægð nr. 3.  

Lægð nr. 3 mun í nótt gleypa þá nr.2 og úr verður ein miðja sem hringsóla mun í kring um sjálfa sig austur og norðaustur af Íslandi á morgun og miðvikudag.

Veðrið hér hjá okkur mun sannarlega taka mið af þessari þróun.  Hvöss N-átt og nokkuð áköf rigning a.m.k. um tíma norðanlands, slydda ofar og snjókoma í efstu fjöll.  Úrkoman á sér sinnhvorn upprunann.  Annars vegar frá bakkanum hér norður af og hins vegar berst rakt loftið fyrir suðaustan land í stórum sveig um lægðina og upp á norður- og norðausturströndum landsins.  Þetta hefur þá í för með sér að lítið eitt hlýnar með N-áttinni, eftir því sem líður á "hretið" !  Einkum á þetta við um norðaustan- og austanvert landið.

Meðfylgjandi veðurkort er HIRLAM-spákort af Brunni VÍ.  Gildistími þess er kl. 12 á morgun þriðjudag.  Þetta veðurkort yrði seint álitið "fallegt" og allra síst í lok sumars eða byrjun hausts.

Athugasemdir

[Þorkell Guðbrands (IP-tala skráð) 13.9.2010 kl. 21:05]

Á http://www.wetterzentrale.de/pics/avnpanel1.html  má sjá á spákortum fyrir dagana 20. - 22.9. n.k. djúpa lægð, sem kemur úr SV og færist austur fyrir sunnan land. Í fávísi minni hef ég dregið þá ályktun af gerð lægðarinnar að þar fari leifar fellbyls. Í gær gerði sama tölvulíkan ráð fyrir að lægðin færi til norðurs vestan við Grænland, en nú hefur spánni sumsé verið breytt verulega. Eigi að síður gæti maður ímyndað sér að hún gæti komið til með að valda hér nokkurri ókyrrð umhverfis landið og á því. Varla horfa þeir, sem þurfa að hafa áhyggjur af Landeyjahöfn, glaðir til þessa ferils lægðarinnar. Fróðlegt væri ef Einar hefði tök á að fara einhverjum orðum um þessa lægð.

[Óskar J. Sigurðsson (IP-tala skráð) 15.9.2010 kl. 13:06]

Vek athygli á 45 mm sólarhringsúrkomu á Grímsstöðum í morgun 15. sept. Meðal ársúrkoma á þeim stað er tæpir 360 mm. Þetta er því rétt áttundi hluti af meðal ársúrkomu.