Horfur mánuðina okt-des

Ég hef viðað að mér þriggja mánaða spám frá Evrópsku reiknimiðstöðinni, ECMWF og IRI stofnuninni við Columbiaháskólann í New York.  Myndin er spákort frá IRI fyrir hitafrávik okt-des. 

Þó ég hafi meiri efasemdir um spár að þessu tagi að haustinu og vorinu heldur en yfir sumarmánuðina og að vestrinum hinsvegar, finnst mér samt rétt að gera spánna nú að umfjöllunarefni.  Það er vegna þess að þessir útreikningar úr sinni hvori áttinni gera ráð fyrir áþekkum meginlínum.

Helstu niðurstöðurnar eru þessar:

a.  Lægðagangur verði heldur minni en vant er austur um Atlantshafið, þ.m. hér við land. 

b.  Áframhaldandi háþrýstingur áberandi suður af Íslandi.

c.  Far lægða og úrkoma eftir því úr norðvestri inn yfir norður Skandinavíu.

d. Nokkuð greinilegt kuldafrávik í Vestur-Evrópu með kjarna yfir Frakklandi.

e. Eindregin líkindi á hlýindum við Vestur-Grænland.

Allir þessir þættir sem að ofan eru taldir einkenna veðurlag sem markast af neikvæðu útslagi Norðuratlantshafssveiflunar (NAO-).  (sjá hér góða yfirlitsgrein Trausta Jónssonar um NAO)

Túlkun þessara spágagna fyrir Ísland verður þá þessi:

Hlýrra en í meðallagi, sérstaklega um vestanvert landið.  Lægðagangur í minna lagi og loftþrýstingur að hærri en að jafnaði líkt og verið hefur mest allt yfirstandandi ár.  Úrkomu er þrátt fyrir þetta spáð nærri meðallagi, helst sunnan- vestanlands að hún verði undir þvi sem vænta má þessa mánuðina.  Minna um A-lægar vindáttir, en meira af vindi á milli S og N.  Kaflaskipt veðurlag er oft fylgifiskur þessa, þ.e. ýmist hlýindi með S og SV-áttum eða kuldi með N- eða NV-átt.  

 

Athugasemdir

[Ari (IP-tala skráð) 3.10.2010 kl. 20:09]

Takk fyrir þennan fróðleik meistari Einar.

Voða gott væri nú að fá þessa mildu spá, mun betra en kuldalegt norðanbál eða djúpar hryðjulægðir hver eftir annarri með vindæsingi.

[Gunnar Sæmundsson (IP-tala skráð) 3.10.2010 kl. 22:36]

Þakka þér fyrir að koma með þetta. Vonandi gengur þetta eftir.

[Hermann (IP-tala skráð) 3.10.2010 kl. 23:01]

Er þetta góð eða slæm spá fyrir stjörnuskoðendur á suðvestur horninu?

Mér hefur þótt norðan áttin best hér, þá eru fallegustu veðrin og stjörnubjart en samt kalt.

Skýjafar og sunnanáttir hljóma ekki spennandi.

[Sigurður Þór Guðjónsson, 4.10.2010 kl. 00:20]

Mig minnir að spáin fyrir sumarið hafi verið rigningarsumar á suðurlandi. Ekki gekk það nú eftir. En ég spái aftaka hörðum vetri og hafísum. Mun sá vetur Býsna og Stóradómsvetur kallaður verða.

[Þorkell Guðbrands (IP-tala skráð) 4.10.2010 kl. 14:12]

Já, Sigurður Þór, og það verður líka bylting, blóðug bylting.