Veður fer enn hlýnandi um helgina

Fyrstu dagar þessa októbermánaðar eru með miklum ólíkindum sökum þess hve veðráttan hefur verið mild.  En það er ekkert lát á þessari tíð a.m.k. ekki næstu dagana og um helgina er spáð hálfgerðu sumarveðri á landinu.

Voldugt háþrýstisvæði verður þá fyrir austan land og beinir það í áttina til landsins sérlega hlýju lofti miðaða við árstíma.  Það þætti meira að segja hlýtt að sumarlagi.  Þó vindáttin sé SA-læg í grunninn er loftmassinn engu að síður þurr enda lægðirnar með sínum úrkomusvæðum víðsfjarri.

Nú er sólargangur hins vegar styttur og í hægum vindinum kólnar næstu jörðu á nóttinni.  Engu að síður má gera ráð fyrir  því að yfir miðjan daginn nái hiti 12 til 14 stigum allvíða. Slíkur hiti heggur nærri hitametum mánaðarins, sérstaklega suðvestan- og vestanlands.  Í Reykjavík hefur hitinn í október hæstur mælst 15,7°C (1.okt 1958) og í Stykkishólmi 16,0°C (9. og 12.okt 1946).  

Eftir að hafa skoðað með hvaða hætti þessum hæstu hitagildum hefur borið að tel ég á þessari stundu yfir helmings líkur á því að hiti á laugardag og kannski frekar á sunnudag nái þessum gildum og að ný októberhitamet verði sleginn.  Meðfylgjandi spákort GFS af wetterzentrale.de gildir fyrir nk. sunnudag kl. 12.  Það sýnir stöðu mála í 850hPa fletinum.  Hiti um 10°C í yfir 1.500m hæð.  Það er svona svipað og sjá má suður við Sikiley þennan sama dag.

Á Norður- og Austurlandi er þessum málum öðruvísi háttað.  Þar hefur hiti nokkrum sinnum mælst hærri en 20°C og hitametið er 23,5°C á Dalatanga frá 1. okt 1973.  Aðdragandinn er ævinlega sá að þetta gerist með hvassri SV-átt þar sem fleygur af mjög hlýju lofti fer hratt yfir landið og staldrar þannig ekki við í nema skamma stund í hvert sinn. Oft er þá stórrigning sunnan heiða, en það þarf þó ekki alltaf að vera svo.   

Athugasemdir

[Þorvaldur Sigurðsson (IP-tala skráð) 7.10.2010 kl. 19:39]

„að ný októberhitamet verði sleginn“

Þú veist vitaskuld að ný met eru sett og þar með eru þau gömlu slegin?  Afar sjaldgæft er að ný met séu slegin, en þar með eru þau auðvitað orðin gömul úr því ný hafa tekið við!

[Þorkell Guðbrands (IP-tala skráð) 7.10.2010 kl. 20:06]

Enn eru til framhaldsskólakennarar sem kenna rétt mál!  -  Þeir breyttu spánni fyrir 15. og 16. október þarna hjá Wetterzentrale.de núna í eftirmiðdaginn og eru nú farnir að spá NA-átt.

[Einar Sveinbjörnsson, 8.10.2010 kl. 09:29]

Ánægður með Þorvald Sigurðsson og ábendingu hans.  Stundum skrifar maður texta sem felur í sér tvöfalda og jafnvel þrefalda neitun ef svo má segja.  Þá verður að passa vel upp á ályktunina eða niðurstöðuna og tekst víst ekki nærri alltaf !

Guðbrandur Þorkell vísar í spár GFS á Wetterzentrale.de.  Þegar keyrslur eru skoðaðar ótt og títt lærir maður fljótt það að loknum tilteknum spátíma, oft 5 til 8 dögum, að þá stekkur niðurstaðan gjarnan fram og aftur.  Ein keyrslan sýnir lægð og S-átt, en sú næsta hæð og N-átt svo dæmi sé tekið. Langflestar veðurspár eiga sér ek. óvissuþröskuld í tíma og þegar þær verða "lausar í rásinni" má segja að komið sé yfir þennan tiltekna þröskuld.  Þegar 10 daga spár eru reiknaðar á 6 klst. fresti eins og nú er raunin vestur í Washington sér maður þessi stökk og hliðarspor oftar, eða í réttu hlutfalli við tíðni útgefinna spáa. En það er ágætur mælikvarði á áreiðanleika eða staðfestu þegar gott samræmi er fyrir tiltekinn dag, t.d. 6. dag héðan í frá á milli keyrslna spálíkansins. 

ESv