Suðurlandsvegurinn í morgunsárið

Þau eru tvö öflin sem takast á í hitanum þennan morguninn.  Sá sem ekur Suðurlandsveg á milli Hveragerðis og Hellu og býr við það að hafa mæli í bíl sínum sér miklar sveiflur.  Þannig voru nú við sólarupprás kl. 8 hiti um 11°C undir Ingólfsfjalli á meðan mælir við Þjórsárbrú sýndi 2°C.

Annars vegar er það þetta sérlega milda loft sem er yfir okkur og á móti verkar sterk útgeislun yfirborðs í náttmyrkrinu.  Þar sem blæs eins og undir Ingólfsfjalli (um 9 m/s) hefur milda loftið yfirhöndina, en þar sem vindur er hægur kólnar yfirborðið, jafnvel niður undir frostmark um leið og sterkt hitahvarf myndast við jörðu.  Við Þjórsá bætist reyndar við að yfirborðssvalinn berst ofan úr sveitum og hálendisbrúninni þegar loft rennur undan hallanum líkt og Þjórsá sjálf. 

Ég heyrði í fréttum að varað hafi verið við hálkublettum í ofanverðum Borgarfirði enda mældist vægt frost bæði á Hvanneyri og Húsafelli.  

Athugasemdir

[Sigurjón Pálsson (IP-tala skráð) 10.10.2010 kl. 16:41]

Þótt ekki koma það hitastiginum við heldur bjartviðrinu þá sást firðarsúla Lennons og Yoko héðan úr Grímsnesinu í gærkvöld. Loftlínan samkv. Google er 54 kílómetrar!

[Áskell Örn Kárason (IP-tala skráð) 10.10.2010 kl. 21:29]

Eg ók leiðina frá Reykjavík til Akureyrar seinnipartinn í dag, fór úr borginni um 15.30. Þá sýndi mælirinn í bílnum 13-14 stig langleiðina upp í Norðurárdal. Þegar komið var yfir á Norðurland og sól að setjast var áberandi hversu miklum mun kaldara var í dalbotnum en á fjallvegum. Mestu munaði í Skagafirði þar sem mælirinn skrapp niður í 1°C yst í Blönduhlíðinni á áttunda tímanum en var sýndi hálftíma síðar 9°C á Öxnadalsheiðinni. Snarlækkaði svo aftur þegar ekið var niður Bakkaselsbrekkuna.