Veðrabrigðin nú eru raunveruleg

Í dag 16. október reiknast meðalhitinn það sem af er mánaðarins vera í Reykjavík 9,6°C.  Sá hiti er í líkingu við júní þ.e. eins og sá mánuður var á árunum 1961-1990.  Síðustu árin hefur júní verið heldur mildari en þetta.  En engu að síður er þessi fyrri helmingur október með því allra hlýjasta sem sést hefur og á það reyndar við um hita um mest land allt.

Nú eru hins vegar veðrabrigði í nánd.  Rétt í þessu voru kuldaskil að koma inn yfir vestanvert landið.  Lægðarmiðja úr vestri berst yfir landið og í kjölsogi hennar berst kalt loft yfir landið úr norðri.  Það kólnar og frystir á landinu á mánudag.  Sérstaklega kólnar um landið norðaustan- og austanvert.  Þar kemur til með að snjóa, a.m.k. einhverja þessara daga, jafnvel á láglendi.

Um miðja vikuna verður hins vegar enn og aftur stutt í milt loft vesturundan. 

Til þess að mánuðurinn í Reykjavík verði í meðallagi þarf hitinn það sem eftir er að vera að jafnaði -1,7°C.  Slíkur kuldi er nánast útilokaður svo lengi á þessum árstíma.  Þó svo að kólni eða hausti með réttu um tíma er engu að síður líklegt að fyrri hluti október sé það drjúgur að hann hafi mikið að segja þegar uppgjör mánaðarins fer fram á endanum. 

Meðfylgjandi spákort Veðurstofunnar er fyrir næsta fimmtudag.  Með nokkrum ólíkindum telst ef 13 stiga frost verður á Akureyri á sama tíma og +5°C er í Reykjavík.  Einnig um frostmark á Raufarhöfn á sama tíma.  Mögulega er óstöðugleiki að hrella spákerfið um leið og veðráttan fer kólnandi!

Athugasemdir

[Kristján Sigurður Kristjánsson, 16.10.2010 kl. 22:16]

Með leyfi; kjölsog!!!!!??????

[Sigurður Þór Guðjónsson, 16.10.2010 kl. 22:42]

Til að þessi október slái metið í Reykjavík frá 1915 verður hann að vera 6,3 stig að meðaltali þá daga sem eftir er. Það er hugsanlegt. Hann virðist ekki ætla að kólna meira en svo sem eitt stig næstu viku og svo hlýnar kannski aftur. Í hlýjustu októberunum, 1915, 1959 og 1946 kom aldrei neitt kuldakast að heitið gat. Og í ýmsum öðrum októbermánuðum. Ef  þessi ætlar ekki að kólna niður úr öllu valdi og enda bara kringum meðallag mun hann heldur betur bregðast væntingum vorum!

[Sigurður Þór Guðjónsson, 16.10.2010 kl. 22:58]

Þarna er orðinu ekki í síðustu setningunni ofaukið.

[Gunnar Th. Gunnarsson, 17.10.2010 kl. 17:40]

Á Stór-Reyðarfjarðarsvæðinu var hitinn í nótt á bilinu 10-11,5 stig og vindur var afar hægur ef nokkur. Einstaka rigningaskúr gerði vart við sig fram eftir kvöldi en svo bætti heldur í, bæðu vætu og vind, þegar leið á nóttina og hitinn lækkaði dálítið með morgninum.