Vef-veður í Danmörku

Í vor hóf Danska Veðurstofan, DMI tilraunir með útsendingar á einhverskonar "sjónvarpsveðri" á vef sínum.  Það er gert þannig að veðurfræðingur á vakt stendur við spákort og útskýrir veðurspána fyrir Danmörku á ekki ósvipaðan hátt og gert er í sjónvarpi, nema að einfaldleikinn er meiri og ekki lagt upp úr útliti, klæðaburði (eða leikrænum tilburðum) veðurfræðingsins. 

Þetta litla myndband er tekið upp í húsakynnum DMI í Lyngby og sett á vefinn tvisvar á dag, kvölds og morgna.  Í frétt á síðu DMI er sagt frá því að um 10.000 manns á dag hafi kynnt sér veðurspánna á þennan hátt dag hvern í ágústmánuði, en notkunin  minnkað aftur eftir að almennum sumarleyfum lauk.  

Fyrir áhugasama er slóðin þessi:http://www.dmi.dk/dmi/index/danmark/webtv.htm

Ég held að einmitt myndræn framsetning sem þessi með almennum útskýringum veðurfræðings henti mörgum og væri góður kostur einnig hér á landi. 

Athugasemdir

[Trausti Jónsson, 20.10.2010 kl. 23:07]

Veðurstofan var að huga að þessu fyrir nokkrum árum - ekki rétt Einar? Meira að segja var staður í kjallaranum í siktinu sem „stúdíó“. Ekkert varð þó úr - ég man ekki hvers vegna.

[Einar Sveinbjörnsson, 21.10.2010 kl. 10:28]

Rétt Trausti !

En hugmyndin komst vart af hugmyndastiginu og svo mætti segja. Kannski skorti áræðið að gera breytingar og bylta forminu ?

ESv

[Marý Steingrímsdóttir (IP-tala skráð) 26.10.2010 kl. 20:09]

En að vera með norðurljósaspár?? Eins og þeir eru t.d. með í Alaska: http://www.gedds.alaska.edu/auroraforecast/