Sveipir í flákaskýjum

Ég tók eftir þessum svipsterku sveipum í flákaskýjabreiðu sem var vestur af landinu í dag, 31. október kl. 13:20.  Iðusveipir eins og þessir eru býsna algengir í streymi lofts af ólíkum toga.  En það eru ekki alltaf til staðar ský til að gera þá sýnilega.

Takið eftir að bugðan byrjar að myndast á jaðri skýjabakkans yfir utanverðum Breiðafirði og hún magnast til vesturs.  Á þessum slóðum var vindur austlægur í dag í hæð skýjanna á að giska 1.000 til 1.500 m.  Láréttur hitastigull næstum þvert á vindáttina var talsverður, þ.e. loftið var kaldara eftir því sem nær dró Grænlandi til norðvesturs.  Það er munurinn á eðlismassa loftsins sem gerir það að verkum að sveipirnir myndast í loftstreyminu eða vindröstinni, sem reyndar var alls ekki hvöss.

Myndin er MODIS mynd tekin úr Terra tunglinu.

Athugasemdir

[Þorkell Guðbrands (IP-tala skráð) 1.11.2010 kl. 09:56]

Datt í hug þegar ég var að horfa á þessa mynd, að þetta er ekki langt frá Hampiðjutorginu, sýnist mér. Þar eru einhver íslensk skip núna, ég allavega veit um Guðmund í Nesi (Brim).