Ein síðasta MODIS myndin í bili

Nú er birtu tekið að bregða það mikið að mjög styttist í það að MODIS ljósmyndirnar bandarísku nái ekki lengur breiddargráðu Íslands.  Engar myndir er að hafa sökum þess hve sól er lágt á lofti frá því um 15. nóv til loka janúar.  

Ein sú síðasta sem næst þetta haustið er hér sýnd og var hún tekin í dag kl.14:10.  Skuggar eru langir og setja þeir mark sitt á myndina.  Vek athygli fagurlega mynduðum skýjasnúð norður af Siglunesi og er hann í tengslum við smálægð sem myndaðist í kalda loftinu yfir mildum sjónum þarna norðurfrá.  Smálægð þessi barst til vesturs fyrir norðan land og skýjasnúður hennar yfir norðanverða Vestfirði.  Þegar þetta er skrifað laust fyrir miðnætti er dimm ofanhríð t.a.m. í Bolungarvík og allhvasst af NA.

Mín reynsla er sú að þegar kalt loft berst að landi, ýmist úr norðaustri, norðri eða jafnvel úr vestri snemma vetrar má gjarnan reikna með meiri úrkomu heldur en spárnar gera ráð fyrir, oftast snjókomu (frekar en slyddu eða rigningu).  Bæði er það að efnismiklir éljagarðar eiga það til að myndast, smá lægðir, drög og aðrir óskilgreindir bakkar yfir hafinu, en sjórinn geymir enn nokkurn varma í yfirborðslögum sínum frá liðnu sumri.  Þegar kalt loftið leitar yfir mun hlýrri sjóinn eiga sér stað varmaskipti og að verulegu leyti gerist sá varmatilflutningur með uppgufun vatns úr sjónum.  

Það er mín tilfinning að oft verði meira úr éljagangi við þessar aðstæður síðla haustsins og snemma vetrar en verið er að spá. Ef sú kenning er rétt er þá mögulega um vanmat eða kerfisbundna skekkju að ræða í veðspálíkönunum.    

Athugasemdir

[atli (IP-tala skráð) 11.11.2010 kl. 00:48]

Hvað er að gerast á sunnanverðu Snæfellsnesi? Það sem líkist reykmekki og teygir sig til vesturs.

[Gunnar Th. Gunnarsson, 11.11.2010 kl. 11:13]

Tek undir með Atla. Athyghyglisvert.

[Gunnar Th. Gunnarsson, 11.11.2010 kl. 11:15]

Þetta ER reykmökkur, það sést betur ef smellt er á myndina þrisvar

[Einar Sveinbjörnsson, 11.11.2010 kl. 14:32]

Hafði ekki rekið augun í strókinn þarna frá sunnanverðu Snæfellsnesi.  MODIS myndirnar gegna líka því hlutverki að fylgjast með eldum á jörðu niðri og logi bál nemur kerfið hitann og setur rauðan punkt á þann stað.  En hitauppsprettan þarf bæði að vera nægjanlega heit og talsverð um sig eigi augað að grípa hana. Líkast til er þetta ekki sinueldur, því hann kemur yfirleitt fram á myndunum.   Á þessum tíma í gær var ákveðin ANA átt, en alls ekki hvöss.  Við nánari skoðun sést að uppsprettan er í Staðsveitinni ekki fjarri bæjunum Álftavatni og Ölkeldu.  Þarna er land vel gróið og sandfok af einhverju tagi nær útilokað. 

Mjög líklega er þetta reykur og ótrúlegt hvað hann berst langt frá þeim stað sem brennur og er sýnilegur lengi.

ESv

[Ingibjörg Jónsdóttir (IP-tala skráð) 11.11.2010 kl. 22:40]

Blessaðir, takk fyrir þetta, var ekki búin að taka eftir þessu.

Hitafrávikið sést aðeins hér:

http://rapidfire.sci.gsfc.nasa.gov/subsets/index2.php?project=firms&subset=Iceland.2010314.aqua.721.250m

Samsvarandi litmynd:

http://rapidfire.sci.gsfc.nasa.gov/subsets/index2.php?project=firms&subset=Iceland.2010314.aqua.250m

Kær kveðja,

Inga