Hafísinn nú 20 sjómílur norður af Horni

Þrálát V- og SV-áttin á Grænlandssundi er nú farinn að valda stíflu í reki íssins á milli Íslands og Grænlands. Eins og þetta kort Ingibjargar Jónsdóttur á Jarðvísindastofnun frá því í gærkvöldi ber með sér, er stutt í ístotu norður af Hornströndum og hefur borist nokkuð ákveðið til austurs síðustu daga og líka verið að nálgast landið.

Ísstífla er einmitt oft fylgifiskur fyrirstöðuhæðar fyrir vestan eða sunnan land.

Viðbót kl. 20:45.  Ingibjörg fór með í ískönnunarflug Landhelgisgæslunnar fyrr í dag. "Ég hef ekki séð svona mikla nýmyndun áður í ísflugi og ekki heldur svona stóra og flotta borgarísjaka :)"  

Nýjar upplýsingar og myndir af ísnum eru á leiðinni.

 

Athugasemdir

[Þorkell Guðbrands (IP-tala skráð) 7.12.2010 kl. 12:27]

Langtímaspárnar benda ekki til að vestlægar áttir á hafinu fyrir vestan okkar séu neitt að láta undan. Þetta skyldi þó aldrei verða hafísvetur?

[Þorkell Guðbrandsson (IP-tala skráð) 8.12.2010 kl. 16:43]

http://www.visir.is/borgarisjakarnir-haerri-en-hallgrimskirkja-%7C-myndir/article/2010648523380

110 metra hár jaki; ef 1/10 er ofansjávar, þá er afgangurinn reikningsdæmi, ekki satt?

[Ingibjörg Jónsdóttir (IP-tala skráð) 8.12.2010 kl. 21:54]

Sæll Þorkell, þetta miðast frekar við rúmmál en hæð, og yfirleitt eru borgarísjakarnir (amk hér á Norðurhveli) meiri um sig neðan sjávar en uppmjórri hluti þeirra ofan sjávar. Þess vegna er því miður ekki hægt að reikna þetta svona. Eðlismassi sjávar (háður hitastigi og seltu) og íssins spilar einnig inn í og gerir þetta hlutfall breytilegt.

[Þorkell Guðbrands (IP-tala skráð) 9.12.2010 kl. 11:40]

Þakka þér fyrir, Ingibjörg. Maður átti svo sem að átta sig á þessu sjálfur! - Hitt er annað mál, að þessar ófreskjur eru ekkert smásmíði í heild, ef gerð er tilraun til að reikna rúmmálið. Eins gott að hafa varann á í grennd við borgarísinn.