15°C á Kvískerjum

Loftið yfir landinu er mjög milt og hvað hlýjast ofan fjalla getum við sagt.  Snörp V-áttin sem nú er ráðandi getur beint lofti úr hæð og niður á láglendi fyrir tilverknað hárra fjalla sem trufla vindröstina. Við niðurstreymi loftsins hlýnar það töluvert.

Á Kvískerjum undir háum Öræfajöklinum hefur í tvígang mælst nokkuð hár hiti af þessum völdum.  Annars vegar í gærkvöldi og síðan aftur í morgun.  Við búum svo vel að hafa tvo vindmæla, annan á sjálfvirkri stöð heima við bæ og hinn niður við þjóðveg. Sá hefur hást farið í 15,6°C og hinn í 15,1°C (í gærkvöldi). Línuritið er frá vegagerðarstöðinni.

Ekki er útilokað að einhvers staðar á Austfjörðum geti á næstu klst. mælst svipaður hiti, en mér þykir það þó frekar ósennilegt, því allra mildast loftið er farið hjá. 

Í morgun þurfti að fara suður til Sikileyjar eða til Spánar við Gíbraltarsund til að finna áþekkan hita.  Á meginlandi Evrópu er frekar kalt, en hins vegar er tiltölulega milt á Bretlandseyjum í dag rétt eins og hér hjá okkur. 

Viðbót:  Að kvöldi 10. des náði hitinn 17,5°C á Kvískerjum. Sjá nánar hér.

Athugasemdir

[Þorkell Guðbrandsson (IP-tala skráð) 10.12.2010 kl. 11:40]

Nú komu nýjar spár frá wetterzentrale.de um kl. 11:00 og þá er að sjá sem veðurfar fari að hrökkva í algengara ástand frá og með 18.12. - þ.e.a.s. ef spáin stenst!