Meira af NV-strengjunum fyrir austan í dag

Ný veðurstöð Vegagerðarinnar í Hamarsfirði sló í 55-56 m/s í hviðum á milli kl. 18 og 19 í kvöld.  Stöðin er staðsett við þjóðveginn á þekktum stað þar sem hnútarnir ganga niður í NV-átt líkri þeirri sem hefur verið í dag. Ég held að þessi mælir sé vel staðsettur og til marks um sviptivindana sem standa af bröttum fjöllunum allt frá Kvískerjum í Öræfasveit austur á Berufjarðarströnd í þeirri vindátt. Hviðustaðirnir eru 12 til 15 talsins á þessum kafla.

Á einum þeirra nærri Borgarhöfn í Suðursveit fór Byggðalínan í sundur í mesta hamnum.  Þegar þetta er skrifað er enn rafmagnslaust á mörgum bæjum, en raflínan þarna er mikilvægur hlekkur í hringtenginu dreifikerfisins. Ekki að fullu vitað hvort staurastæðurnar hafi hreinlega brotnað í mestu sviptingunum, en veðurhæð til fjalla var á síðdegis um 35-40 m/s.  

Sveinn H. Oddsson í Neskaupsstað sendi mér svohljóðandi lýsingu:

Ég rak augun í það í dag, sem og hef tekið eftir því að ekki er eins hvasst hér í Neskaupstað og víða í kring. Á veðurstöðinni virðist nefnilega vera meira og minna hrein sunnanátt þrátt fyrir norðan-strenginn sem er hér í kring. Þetta á við nánast allar veðurathuganir dagsins, hingað til a.m.k. Bærinn er virðist vera í nokkuð góðu skjóli fyrir hreinni norðan-átt en um leið og það fer að halla meira í norðaustur eða norðvestur þá rýkur hann upp aftur hér, eins koma hviður hérna í norðanáttinni en jafnaðarvindurinn nær sér ekki á strik.

 

Klippimynd af veðurathugunarsíðu VÍ frá því fyrr í dag fylgir hér með. Sveinn lét reyndar fylgja með að inni í sveit á Norðfirði hefði verið bálhvasst og kyrrstæður bíll fokið til og á hús, en líkast til hafi hálka verið til staðar.

 

Myndin að ofan er máluð af Magnúsi Sigurðssyni. (sjá hér)  Hún er úr Hamarsfirði nokkru austan við þann stað þar sem vindmælirinn nýi er staðsettur.  Þarna liggur líka byggðalínan áfram austur úr og sömu gerðar eru staurastæðurnar í Suðursveit. 

 

Athugasemdir

[Jón Þorbergsson (IP-tala skráð) 17.12.2010 kl. 16:02]

Þarna er ruglað saman byggðalínu hringtengdri og dreifilínu Rarik á milli bæja. Byggðalínan er 132KV og ekkert úttak er af henni milli Prestsbakka og Hóla í Hornafyrði , og hún fór út um kl.17 þann 16. og var úti til hádegis þann 17. Það olli ekki miklu rafmagnsleysi þar sem ekkert er tekið út af henni á þeirri leið, og trufluninni olli sennilega samsláttur á línum í rokinu. Bilunin sem veldur straumleysinu í Öræfum og að Hestgerði  er brotnir staurar í dreifilínu Rarik sem er með byggðinni frá Höfn út í Skaftafell.

[Einar Sveinbjörnsson, 17.12.2010 kl. 19:41]

Þetta er rétt hjá Jóni Þorbergssyni, það var RARIK dreifilínan sem brotnaði og þegar allt komst í samt lag skömmu fyrir hádegi lét Landsnet þess getið í tilkynningu.

"Prestbakkalína 1 var sett inn á nýjan leik kl. 11:30 og í framhaldinu var rekstur flutningskerfisins færður í eðlilegt horf. Ekki var um bilun að ræða á línunni eins og fyrst lék grunur á."

Staurabrotið í dreifilínunni orsakaði útslagið á Byggðalínu (Prestbakkalínu 1) að að öllum líkindum.

ESv