Vetrardagurinn fyrsti ?

Sjálfur eru ég haldinn einkennilegri sérvisku þegar kemur að vetrarveðráttunni.  Held því fram við hvern sem vill heyra að það sé ekki kominn vetur í raun fyrr en íbúar um vestanvert landið fá að finna fyrir útsynningsveðráttu með sínum lemjandi éljagangi.  Þennan veturinn höfum við þurft að bíða óvenjulengi eftir slíku veðurlagi, en kom að því gær, 17. janúar.  Í mínum huga markar því þessi dagur fyrsta daga vetrar. Fram að því hefur verið langt haust með alls kyns veðri. Oft hafa þessir haustdagar vissulega verið kaldir !  Þessi skilgreining á haustinu er klárlega á skjön við aðra sem ég hef líka viðrað, nefnilega þá að í október hefðum við svo að segja hrokkið beint úr sumrinu yfir í veturinn.  Þá er eingöngu horft á hitafarið, en ekki uppruna loftsins og ham veðursins eins og mín sérviska býður upp á.

En að veðrinu í gær.  Úr vestri barst lægð með svölu éljalofti og fór hún svo að segja rakleitt austur yfir landið. Suðvestanvindurinn um landið suðvestanvert tók dálítið í seinni partinn í gær og glóði á éljabakkana undir sólsetur.

Með lengri degi og hækkandi sól um miðjan daginn eru MODIS-myndirnar nú aftur orðnar brúklegar. Á meðfylgjandi mynd kl. 13:33 og löguð er til af Ingibjörgu Jónsdóttur sést skýjasnúðurinn umhverfis lægðarmiðjuna einkar vel.  Eins er landið sjálft meira og minna hulið snjó ef sandarnir suðaustanlands eru undanskyldir.

 

Athugasemdir

[Emil Hannes Valgeirsson, 18.1.2011 kl. 12:49]

Mér finnst útsynningur með éljagangi alltaf vera frekar skemmtilegt veður hér suðvestanlands. Ég hef ekki skoðað það sérstaklega en getur verið að þetta veðurlag sé sjaldgæfara nú í seinni tíð miðað við það sem var á kaldari tímum fyrir svona 15-30 árum?

[Ari (IP-tala skráð) 18.1.2011 kl. 13:47]

Sjálfur myndi ég skilgreina komu veturs þannig: snjór helst lengur en 2 sólarhringa á jörðu :)