Hiti langt yfir meðallagi

Þorrinn heilsar með vænni hláku.  Meginskilin á Atlantshafinu fóru á bóndadaginn (21. jan)  norður yfir landið.  Mikið háþrýstisvæði er staðsett yfir og aðeins vestur af Bretlandseyjum.  Það stýrir veðrinu nú um stundir og heldur meginskilunum fyrir norðan land lengst af næstu dagana og til okkar berst því í hægðum sínum milt loft af suðrænum uppruna.

Kortið er spákort HIRLAM, gildir á miðnætti 22. janúar.  Skotvindurinn sem að jafnaði liggur sunnarlega á Atlantshafi í janúar hefur skotið upp kryppu fyrir norðan land og á meðan erum við heittempruðu megin við  meginskilin. 

Þó skilin slengi sér inn á Vestfirði á sunnudag, munu þau meira og minna halda sig fyrir norðan landið fram á miðvikudag.  Það hefur í för með sér að hitinn í Reykjavík mun verða þessa fimm daga (lau. - mið) um 7°C yfir meðalhita janúar sem er -0,5°C. (1961-1990).  Á Akureyri gæti frávikið orðið enn stærra og þar má reikna með að hitinn verði um 9°C yfir janúarhitanum sem að jafnaði er -2,1°C.  Þó þessar tölur virki stórar, er samt ekki um neitt afbrigðilegt ástand að ræða umfram það sem fylgir vetrarhlýindum eins og þessum.

Þessi spá um áframhald á milda loftinu fram á miðvikudag verður að teljast vera nokkuð áreiðanleg, en hvað tekur við eftir það er meira á huldu.