Að gá til veðurs

Fyrir mörgum árum var flugmaður einn, orðvar og varkár inntur eftir þjónustu veðurfræðinga hér á landinu.  Einkum hvernig honum þætti flugvallaspárnar standast.  Þetta var fyrir löngu síðan þegar veðurfræðingar grúfðu sig ofan í sín veðurkort og tölvureiknaðar spár rétt að byrja að ryðja sér til rúms.  Svar hans var skýrt og nokkurn veginn svona: " Veðurfræðingarnir mættu nú gera meira af því að líta upp og horfa út um gluggann."

Mér kom þessi gamla saga í hug þegar ég las Barnalán Fréttablaðsins í morgun. Maður stendur sjálfan sig allt of oft að því að hengja sig í veðrið eins og það er reiknað eða teiknað upp á tölvuskjánum í stað þess að gá einfaldlega til veðurs, rýna í skýin, skoða sjóndeildarhringinn, finna hitann og rakann á eigin skinni o.s.frv.

 

 

 

 

 

 

 

 (Fréttablaðið, 25. janúar 2011)

Athugasemdir

[Þorkell Guðbrands (IP-tala skráð) 25.1.2011 kl. 13:35]

Talandi um að líta út og upp; það hefur verið býsna skemmtilegt að fylgjast með skýjamyndunum hér yfir Skagafirði í morgun og því miður var ég ekki með myndavélina tiltæka. Vindur var nærri 270° framan af morgni, lægði svo og færði sig í ca. 200 - 210°. Skýrar fjallabylgjur komu greinilega fram, en svo létti vel til. Það erum við gamla fólkið nokkuð sátt við því: "Sé heiðskírt veður og himinn klár/á helgri Pálus messu/mun þá verða mjög gott ár/maður gættu að þessu", þ.e.a.s. ef ég fer þá rétt með þennan forna kveðskap.

[Þráinn Jökull Elísson, 25.1.2011 kl. 13:45]

Góður!

[Þorkell Guðbrands (IP-tala skráð) 25.1.2011 kl. 13:53]

Já, og það er rétt að bæta því við, að þ. 25.1. sést sólin héðan séð í fyrsta skipti á árinu fara yfir tind Staðaraxlarinnar, sem er nánast í réttvísandi hásuður frá stærstum hluta byggðarinnar hér á Sauðárkróki. Í dag er sólin í réttvísandi hásuðri kl. 13:31 (13:40 í Rvík) Þegar þessum áfanga er náð, finnst mér fyrir mína parta að svartasta skammdeginu sé lokið, en það er auðvitað mismunandi hvað fólki þykir í því efni.