Ísinn á Norðurskautinu - hver er munurinn ?

Þá er það smá gáta.  Nú er hávetur á norðurslóðum.   Mynd af þekju íssins í dag og sambærileg frá því í fyrra nánast upp á sama dag.   Í hverju liggur munurinn ?

Þessar myndir eru fengnar af The Cryospheretoday.com. Er einhver munur á ísútbreiðslunni þá (2010) og nú ?

 

 

Athugasemdir

[Emil Hannes Valgeirsson, 27.1.2011 kl. 23:55]

Ekki er nú munurinn mikill við fyrstu sýn. Það má þó sjá að ísinn er minni í ár vestur af Grænlandi og við Labrador en hinsvegar er meiri ís við Svalbarða. Grunar mig nú að þetta sé í einhverju samræmi við öfugsnúnu hringamyndunina sem fjallað var um hér síðast.

[Hörður Þórðarson, 28.1.2011 kl. 00:00]

Núna er meiri ís á Svalbarðasvæðinu og norðvestur af Íslandi en minni við vesturströnd Grænlands. Eins og ætla mætti miðað við þrárláta stöðu fyrirstöðuhæðarinnar.

[Gunnar Th. Gunnarsson, 28.1.2011 kl. 00:44]

Meiri ís í Bieringsundi og út í Kyrrahafið í dag.

Mér sýnis myndin fyrir árið 2010 hafa dekkri fjólubláan lit á ísnum. Þýðir það þykkari ís?

[bugur (IP-tala skráð) 28.1.2011 kl. 04:57]

Hví í ósköpunum ættir þú að leita uppi mun milli tveggja ára?

Hvort heldur sá munur finnst eður ei, hvaða ályktanir viltu draga af hvoru tveggja?

Ætlar þú að túlka gátuna þína?

[Þorkell Guðbrands (IP-tala skráð) 28.1.2011 kl. 10:06]

Tek undir með Emil Hannesi og Herði andfætlingi vorum. Reyndar, já, er líklega meiri nýmyndaður ís suður af Beringssundi. (Vitus Bering, hét hann, skipstjórinn, sem það er kennt við, ekki Biering).  En það er líka sjónarmunur á ísnum hér næst okkur, austur af Grænlandi.

Svo eru býsna slæmar horfur fyrir næstu helgi, sýnist manni!

http://www.wetterzentrale.de/pics/avnpanel1.html

[Guðmundur Jónsson, 28.1.2011 kl. 12:03]

Minni þéttleiki og sennilega meiri útbreiðsla í dag en fyrir ári. 

Hvaða ályktanir eigum við svo að draga af því ? 

[Einar Sveinbjörnsson, 28.1.2011 kl. 12:04]

Samkvæmt upplýsingum frá Cryosphere Today er heildarflatarmál íssins nú rúmlega 1 milljón ferkílómetrum undir viðmiðun (meðaltali), en á sama tíma fyrir ári var útbreiðslan tæplega 1 milljón fkm. frá meðaltali.  Sjá línurit hér. Þarna munar kannski um tvöföldu flatarmáli Íslands. Mest ber á því hversu minna er af ís við V-Grænland og Labrador.  Þarna var eins og menn mun a sérlega milt framan af vetri, en nú er komið "eðlilegt" vetrarástand og ísinn mun því þekja stærri hafsvæði næstu vikurnar.

En það sem mér þótti athyglisverðast í þessum samanburði á milli ára og Hörður og Emil Hannes benda á, er breytingin við Svalbarða.  Þar hefur verið kaldara en undanfarna vetur og enn eru vetrarhörkur þar. Frostið um þessar mundir yfir 20 stig í Longyearbyen. Vindar hafa líka blásið með þeim hætti sem hagstætt er fyrir ísútbreiðslu á þessum slóðum sem og nýmyndun.  

Hér fylgir ískort frá Norsku Veðurstofunni og sjá má að farið er að bera á ís með vesturströndinni, en útbreiðsla þar er síður en svo árviss. 

ESv