Klasar élja í ratsjánni

Þessa áhugaverðu mynd sýndi ratsjá Veðurstofunnar í SV- og V-áttinni í gær.  Nokkuð samfeldur skýjaflóki í tengslum lægðardrag kom úr suðvestri snemma um morguninn.  Sjá má í suðurjaðar hans yfir Breiðafirði og Snæfellsnesi.  Þar fyrir sunnar eru síðan tveir afmarkaðir éljaklasar.  

Éljaklakkarnir sem koma af hafi í útsynningnum eru oft nokkuð jafndreifðir og við bestu dreifingu mynda þeir reglulega dreifingu séð bæði með auga rastjárinnar og á mynd gervitunglsins. Sami vindur eða í það minnsta mjög svipaður á stóru svæði skapar reglubundna dreifingu éljanna.  Um leið og vindurinn annað hvort eykst eða minnkar á tilteknu svæði hefur það áhrif, annað hvort til að þjappa éljum saman í í einn samfelldan garð eða að teygja á þeim þannig að "hrein" og opin svæði verði sýnileg mitt í éljaloftinu.  

Þannig var þessu háttað í gær.  Hofum við á myndina frá norðri til suðurs, var staðbundið hámark í styrk  V-áttarinnar sunnan við samfellda úrkomusvæðið við Snæfellsnesi.  Þar sunnan við dró úr vindi áður en kom að öðru vindhámarki í skammt suðvesta við Reykjanes.  Hér er einkum átt við vindstyrk í 1.000 til 2.000 metra hæð.  Það eru sem sagt sveiflurnar í styrk vindrastarinnar sem skapa þetta skemmtilega mynstur éljaskýjanna !

Athugasemdir

[Norðri (IP-tala skráð) 31.1.2011 kl. 15:22]

Alltaf gaman að lesa svona pælingar hjá þér út frá myndum, hvort sem þær eru ftá ratsjá eða tunglum.

Nýlega var Veðurstofan að auglýsa eftir færanlegri ratsjá til að vakta eldgos og tilheyrandi gosmokk. Það blasir auðvitað við hve nauðsynlegt slíkt tæki er, í ljósi atburða síðasta árs.

Á myndinni hér að ofan sést hve takmarkað drægi núverandi veðurratsár er. Telur þú að væri þörf að setja upp aðra slíka? Hvar væri best að staðsetja hana? Hverju mundi hún breyta varðandi varðandi veðurspár og veðurupplýsingar fyrir þau svæði sem núverandi ratsjá nær ekki?

[Einar Sveinbjörnsson, 31.1.2011 kl. 15:54]

Eftir því sem ég best veit fyrirhugar Veðurstofan að koma fyrir annarri ratsjá á Teigsbjargi ofan Fljótsdals.  Alþjóðlegu flugmálayfirvöldin hafa í það minnsta áhuga á örðum stað fyrir veðursjá. Margt kemur þar til, auðvitað nálægð við varavöllinn á Egilsstöðum, en vitanlega spilar sá þáttur að geta fylgst betur með mekki frá eldgosi miklu í þeirri viðleitni. Hins vegar hef ég ég ekki frétt nýverið af frekari áætlunum um uppsetningu.

ESv 

[Norðri (IP-tala skráð) 31.1.2011 kl. 22:05]

Það er gott að heyra að eitthvað er í gangi.

Eru það svipaðar ratsjár sem skynja gosmökk og koma að gagni við upplýsingaöflun um veður?

Varðandi veðurupplýsingar og spár, þá er ég kannski að velta fyrir mér veðrinu norðan línu sem er dregin frá sunnanverðum Vestfjörðum til sunnanverðra Austfjarða. Og þá m.t.t. úrkomumagns og snjoflóðahættu. Kannski nákvæmari staðarspáa?

Eru þið kannski með svo góðar upplýsingar nú þegar, að þetta er orðin gömul og úrelt tækni?