Gripið til stóru orðanna

Það er fullt tilefni til þess að nú sé gripið til stóru orðanna í veðurspánni.  Veðurstofan talar nú um ofsaveður og veðurhæð allt að 30 m/s.  Hér áður á meðan vindstigin voru við lýði tíðkaðist að vara við stormi eða 9 vindstigum (um 21 m/s).  Þegar þurfti að bæta í var talað um storm eða rok sem eru 10 vindstig.  Sjaldan og aðeins við sérstök tilefni var gripið til að spá 11 vindstigum eða ofsaveðri.  Vindbil ofsaveðurs er 28,5-32,6 m/s, en þar tekur efsta stigið í vindstigakvarðanum, þ.e. fárviðri við.

Þessi notkun vindstigana er það eina sem ég sakna umfram það sem línulegi mælikvarðinn m/s býður upp á. Ekki síst fyrir það að augnbliksvind, þ.e. vindhviðurnar, er ekki hægt að setja fram með vindstigum.  Efri hluti vindstigakvarðans auðveldaði sem sagt spámönnum að gefa út flokkaðar viðvaranir og flestir skyldu sæmilega við hvað var átt.

En aftur að spáðu ofsaveðri.  Gert er ráð fyrir því að þessi lægð nr. 2 í syrpunni verði bæði dýpri og heldur nærgöngulli en sú fyrsta. Lægri skotvindurinn á undan skilunum í hæðinni um 1.000 til 2.000 metrum verður þannig heldur meiri ef af líkum lætur og þar með styrkur vindsins niðri við jörðu.  Ætla má að suðvestanlands nái vindur hámarki eftir um sólarhring eða á milli kl. 06 og 09 í fyrramálið.  Vindáttin verður meira SA-læg (í stað A-áttar í fyrra veðri).  Það hefur í för með sé m.a. að vindur nær sé frekar á strik á Höfuðborgarsvæðinu, svo ekki sé talað um Suðurnes.  Einnig á Snæfellsnesi svo nokkrir staðir séu nefndir, en vissulega verður slæmt veður um land allt þegar kemur fram á daginn.

Spákortið sem hér fylgir er frá Met.Office í Bretlandi og gildir kl. 06 í fyrramálið. Ath að 4 hPa eru á milli þrýstilína á þessum kortum í stað 5 eins og venja er. 

Athugasemdir

[Guðjón Sigþór Jensson, 10.2.2011 kl. 10:13]

Síðust helgina í janúar, einkum upp úr hádegi á laugardeginum 29.1. varð mjög hvasst á SV landi. Þá var eg staddur á Hvanneyri í Borgarfirði og var varla stætt fyrir veðri og vindum. Síðdegis ók eg suður og var mjög hvasst undir Brekkufjalli í Andakíl og mikil hætta á að aka út af vegna þess hve vindurinn var sterkur þvert á veginn. Þá var áttin úr hásuðri eða næst því. Undir Hafnarfjalli, alræmdu veðravíti var mun lygnara og þegar kom suður á Kjalarnes var nánast logn, veðrið hafði gengið niður. Vindáttin skiptir oftast meginmáli en þegar vindurinn er af landsuðri og skellur á Ölver, þá liggur strengurinn vestur með fjallinu og skellur með fullum þunga á um 4 km leið á Vesturlandsvegi, frá Narfastöðum og inn eftir að Hafnarskógi þar sem alltaf er lygnara í SA áttinni.

Við þurfum að leggja áherslu á umfangsmikla skjólbeltarækt í grennd við þessi veðravíti, planta trjáplöntum sem þrífast vel þarna og eru vindþolin. Þarna var byrjað að planta fyrir um áratug en þarf að halda áfram í stærri stíl. Í næsta nágrenni er stundaður umtalsmikill landbúnaður þar sem unnt væri að fá nægan skít til jarðvegsbóta. Þetta er auk þess atvinnuskapandi, ekki veitir af og veitir betra öryggi þegar fram líða stundir!

Góðar stundir.

Mosi

[Þorkell Guðbrandsson (IP-tala skráð) 10.2.2011 kl. 21:01]

Athyglisverðar pælingar hjá Guðjóni Sigþóri. Spurning hvort brúnberktur Alaskavíðir, sem vex frekar hratt, væri ekki heppilegur í þessi skjólbelti?  -  Í framhaldi af því kemur mér í hug það sem staðkunnugur maður sagði mér eitt sinn, að hefði vegurinn verið lagður niður í fjöru frá Seleyrarbrúnni og yfir Grunnafjörð og Akranesmegin við Akrafjallið, hefði fengist miklu minna veðurálag á veginn. Ekki þori ég að fullyrða neitt í þessu sambandi!