Snjóar og snjóar að kvöldi 30. apríl

Spáin bar það með sér fyrr í dag að veðurskil yrðu nánast kyrrstæð yfir suðvestur- og vesturhluta landsins í dag.  Maður hefur séð þetta svo sem gerast áður að vorlagi eða í blávetrarlokin að skörp veðurskil eiga það til að setjast sem fastast.  Ævinlega er veður þannig að austan þeirra (eða sunnan, sé legan A/V yfir landið) er snarpur og mildur vindur, en vestan eða norðan þeirr hæglæti þar sem kalt loft berst að með þeirri afleiðingu að í vestur og norðvesturjaðrinum getur snjóað og snjóað.

Höfuðborgarsvæðið og Suðurnes hafa einmitt hafnað snjómegin við skilin sem og Borgarfjörður og Mýrar.  Á sama tíma og kyngt hefur niður snjónum hefur hitinn verið þetta 8 til 9°C fyrir austan fjall. Ratsjármyndin sem hér fylgir er frá kl. 23:00 þann 30. apríl og sýnir hún vel hvað um ræðir (mynd af vef Veðurstofu Íslands).

Ég gerði mér það til gamans seint í kvöld að grípa með mér gönguskíðin niður í Engidal hér steinsnar frá.  Aðallega til þess að geta sagt síðar meir að ég hafi komist á skíði 1. maí hér í bænum ! Það var svo sem ágætt rennsli, en furðusvipur var á mörgum bílstjóranum sem maður "gekk" fram á við Álftanesveginn. Náði að brjóta staf við þessar sérkennilegu aðstæður, en það var e.t.v. reynslunnar virði.

Í fyrramálið verður skoðað hvort að "skemmtriðið frá 1. maí 1987" eins og Trausti Jónsson kallar það hafi endurtekið sig. 

 

Athugasemdir

[Gudmundur Júlíusson (IP-tala skráð) 1.5.2011 kl. 01:41]

Einar, Trausti var með þetta á hreinu í gær, ekki sá ég þetta í kortum í fréttum Ruv eða Stöð 2 ??

[Sigþór Sigurjónsson (IP-tala skráð) 1.5.2011 kl. 05:35]

Les ávalt og hef gaman af bloggi ykkar veðurfræðinga. Hvet ykkur til dáða þrátt fyrir...En mér mælast níu sentimetra snjólag hér í Garðabæ á veröndinni snemmmorguns fyrsta maí 2011.

Sumarkveðjur. Sigþór

[Sigurður Þór Guðjónsson, 1.5.2011 kl. 07:09]

Gaman að heyra frá þér á ný eftir langt hlé!

[Óli minn, 1.5.2011 kl. 09:39]

Best að renna sér í kröfugönguna.