Loftið nú ættað frá S-Svíþjóð

Miklar eðilsbreytingar í veðrinu eiga sér nú stað, sérstkalega ef horft er til vesturhluta landsins. Hitaskil fóru norðvestur yfir landið í nótt.  Í stað þess að loftið eigi sé suðvestlægan eða vestlægan uppruna líkt og verið hefur meira og minna síðustu vikurnar er loftið nú komið að úr suðaustri og austri.

Tók mig til og lét aðgengilega reiknigátt hjá NOAA finna út uppruna þess lofts sem spáð er að verði yfir landinu suðvestanverðu á hádegi i dag.  Ferillinn sýnir loft í 500 metra hæð yfir landinu.  Um miðjan dag sl. föstudag var það yfir S-Svíþjóð og þar í um 1500 metra hæð.  Síðan barst það yfir Sjáland og Jótland, áfram vestur yfir Norðursjó, nokkurn veginn með stefnu yfir Glasgow í Skotlandi og handan fjallanna þar varð niðurstreymi loftsins eins og oft vill verða hlémegin í slíkum straumi þó veikur sé.

Búið er að vera milt og sumarlegt veður á þessum slóðum undanfarna daga og því er von á góðu hér suðvestanlands og reyndar um land allt ef út í það er farið.  Loft af þessum uppruna nú er nokkuð mengað og munum við ef af líkum lætur hafa yfir okkur mistur í einhverjum mæli.  Ekki er það nú samt allt mengun, því vel þekkt er að smágerð frjókorn frá meginlandi Evrópu berast gjarnan til landsins þegar uppruninn er þaðan framan af í  maí mánuði.

Ef spárnar ganga eftir verður veður með besta móti miðað við árstíma alla veganna fram á fimmtudag, bæði milt og sólríkt. Það var tími til kominn um landið vestanvert eftir alla vætuna og sólarleysi frá því fyrir páska.

Athugasemdir

[Vilhjálmur Örn Vilhjálmsson, 2.5.2011 kl. 08:04]

Er ekki líka smá loft frá Danmörku?

[Ö. Jónasson (IP-tala skráð) 2.5.2011 kl. 08:34]

Sæll Einar og gaman að þú ert farinn að blogga aftur um veðrið. 

Hvað hefur alið manninn?

Kannski að veðrið fari nú að lagast eftir að þú ert farinn að láta í þér heyra hér á blogginu.

[Sigurður Þór Guðjónsson, 2.5.2011 kl. 12:17]

Er ekki aðallega óloft sem kemur frá Damnaveldi?!!

[Jóhann Grétar Kröyer Gizurarson (IP-tala skráð) 2.5.2011 kl. 16:59]

Hitamælirinn í skugganum hérna í Austurborginni sýnir 15,5 c° (Veðurstofan segir að hann sé 15 c°). Sé að það er mistur yfir. Kemur ekki á óvart að þessi fretmóða sé ættuð frá Skandínavíu, enda Skandinavar loftmikið fólk :)