Mistrið suðvestanlands í dag

Um kl. 17 í dag tók mjög fyrir skyggni suðvestanlands í brúnleitu mistri sem þá lagði yfir.  Fyrr um daginn heafði greinileg móða einnig verið í lofti.  Í kvöld var sólin síðan rauðglóandi í ljósbrotinu sem einkennir oft  mengunarmóðuna sem ættuð er frá Evrópu.

Á þessari MODIS-mynd (Terratunglið) frá því kl 13:25 sér í suður- og suðausturströnd landsins.  Mjór sandstrókur til norðvesturs  frá Landeyjasandi sést nokkuð greinilega.  Hann er brúnleitur og stefnir á Ölfus.  Sunnar á myndinni yfir hafi skammt austan skýjabakkans sem liggur N-S sést vel í slæður af dæmigerðri reykjarmóðu.  Hún er ættuð af landsvæðunum í austri.  Þarna er reykurinn það þéttur að hann kemur vel fram á tunglmynd eins og þessari.

Við lærðum á þessi fyrirbæri og túlkun þeirra þegar við fengum yfir okkur úr austri þykkan reyk dagana 7. og 8. maí 2006.  Þá þótti sólarlagið afar dulúðugt.  

Athugasemdir

[Guðrún María Óskarsdóttir., 3.5.2011 kl. 00:29]

Sæll Einar.

Ég taldi mig þekkja það í dag, sem í æsku kallaði " blámóðu " þ.e týpiskt mengunarmistur frá Evrópu, sem ætíð litaði Eyjafjallajökulinn á mínum æskuslóðum bláleitri sýn.

Ég átti einnig göngutúr í kvöldsólinni og mér fannst að meira en móðan frá Evrópu ætti þátt í því hvað sólin var sérstök og varð hugsað til jökulsins í því efni.

kv.Guðrún María.

[Einar Sveinbjörnsson, 3.5.2011 kl. 00:36]

Sunnlendingar, einkum Skaftfellingar hafa sagt mér að á árunum um og fyrir 1960 hafi "blámóðan" verið mun algengari en síðar varð.  Það tengi ég almennt séð meiri mengun sem þá var í Evrópu, ekki síst á Bretlandseyjum.  Kvað svo að þessu stundum í þurri SA- og A-átt að finna mátti vægan ódaun í lofti.

ESv

[Guðrún María Óskarsdóttir., 3.5.2011 kl. 00:57]

Já einmitt, sú blámóða sem ég man eftir var illa lyktandi svona eins og þotueldsneytisilmur í Vatnsmýrinni.

kv.Guðrún María.