Í flestu óvenjulegur apríl

Yfirlit fyrir apríl 2011 liggur nú fyrir á vef Veðurstofunnar og vísa ég til þess hér.  

Það er fernt sem í mínum huga sem stendur upp úr í afbriðgilegheitum þessar mánaðar:

1.  Hlýindin fyrir austan.  Aldrei hefur verið hlýrra á Dalatanga í apríl.  Þar var meðalhitinn 5,5°C og reyndar 6,4°C í Neskaupsstað á sjálfvirkum mæli þar.

2.  Meðalloftþrýstingur var sá lægsti í Reykjavík í meira en 100 ár fyrir apríl.

3.  Í samræmi við afar lágan loftþrýsting var sérlega vindasamt, sérstaklega suðvestanland.  Oftast af SV-, S- eða SA.  (meira um þann þátt síðar hér á veðurblogginu).

4.  Úrkomusamt var víða vestan- og suðvestanlands.  Þannig taldist aðeins einn dagur vera þurr í Reykjavík.

Allir þessir þættir hér að ofan hanga saman.  Orsökin liggur á stóru loftþrýstifráviki hér vestur af landinu. Það var aftur í tengslum við mikinn og þrálátan háloftakulda enn vestar og eins fyrir sunnan Grænland. Hér fara á eftir tvö frávikakort sem rétt er að gaumgæfa í þessu samhengi.

 

 

 

 

 

 

 

 

Frávik meðalloftþrýsings í apríl 2011 í grennd við Ísland.  Þrýstilágmarkið er um 20 hPa undir meðallagi. Þrálátir S- og SV-vindar þurfa ekki að koma á óvart þegar svona háttar til (NCEP/NCAR)

 

 

 

 

 

 

 

 

Frávik hita í 500 hPa fletinum í apríl 2011 (5000-5500 metra hæð).  Kalda loftið í háloftunum teygir anga sína suðaustur yfir Grænland.  Af Grænlandshafi barst éljaloft ótt og títt  vegna þessa og flestar lægðir úr suðri snardýpkuðu hér við land um leið og þær komust í námunda við háloftakuldann.

 

 

Athugasemdir

[Danni nemandi þinn í loftlagsfræði (IP-tala skráð) 3.5.2011 kl. 12:50]

Er meira um atriði 3 seinna hér á veðurblogginu útaf þetta kemur í spurningu í loftlagsfræðiprófinu á morgun?

[Höskuldur Búi Jónsson, 3.5.2011 kl. 13:13]

Þú ert með dýrðlega nemendur Einar

[Gunnar Th. Gunnarsson, 3.5.2011 kl. 18:24]

Það þarf ekki hitamæla til að sjá að þetta hefur verið einstaklega hlýr aprílmánuður, hér á Reyðarfirði. Gróandinn er 3-4 vikum á undan, b´ði á trjám og túnum.

Guð blessi gróðurhúsaáhrifin!

[Sigrún Björgvins (IP-tala skráð) 3.5.2011 kl. 23:07]

Já þetta hefur verið yndislegur aprílmánuður á Héraði. Gróður áreiðanlega mánuði á undan meðalári. Útlendu trén ruglast í ríminu og eru allaufguð t.d. heggurinn. Jafnvel björkin kann sér ekki læti og lætur fallerast. En hvernig verður framhaldið Einar. Þú veist að mikið vill meira. Getum við búist við að maí verði langt yfir meðaltal í hita.

Þakka fyrir alla þína fræðandi þætti. Sigrún

[Ævar (IP-tala skráð) 4.5.2011 kl. 14:33]

Ætli það.. Nú fer örugglega hin þráláta austan- og norðaustan átt að taka völdin. Ekki finnst mér hún hafa verið skemmtileg hér á SV-horninu síðustu sumur, ekki ský á himni eða dropi úr lofti allt sumarið.

Annars flott veðurblogg.