Af sjaldséðum kuldametum

Á sama tíma og vestur Evrópubúar stæra sig af hitametum í apríl berast fregnir af sjaldséðum kuldametum frá  Grænlandi.  Það á til dæmis við um stöðina Qaanaaq í norðveturhlutanum þar sem aprílhitinn endaði í -18,5°C og hefur aldrei verið lægri.  Mælingasagan þar er hins vegar ekki ýkja löng.  Sunnar eða í Kangerlussuaq sem við þekkjum betur með danska heitinu Syðristraumsfjörður er búið að mæla mun lengur.  Þar var einnig um kuldamet að ræða, aprílhitinn -15,9°C þegar meðalhtinn er -7,8°C.  Læt lesendum um að reikna frávikið !

Það er vel þekkt andspæni hitafarsins á Grænlandi, einkum V-Grænlandi og Evrópu.  Það verður í tengslum við Norðuratlantshafssveifluna (NAO) sem var í sérlega ákveðnum jákvæðum fasa í apríl.

Í Danmörku var hitinn þannig 4,2°C yfir meðalhitanum.  Sænska veðurstofan (SMHI) hefur gefið út meðfylgjandi frávikakort fyrir jörðina alla. Þar kemur umrædd tvípólun vel fram, kalt frávik við Grænland og hlýtt yfir allra V-Evrópu.  Takið eftir Íslandi í þessu sambandi.  Austurhluti landsins tilheyrði Evrópu í þessu tilliti með sínum möru mjög mildum dögum.  Vesturhlutinn var hins vegar meira undir áhrifum kuldans í vestri, jafnvel þó svo að meðalhitinn hafi alls ekki verið svo lágur.  Meira að kuldinn í háloftunum hér í vestri hafi mótað veður á marga lundu og því meir eftir því sem vestar dró á landinu.

Hitinn var þetta 3 til 5°C  yfir meðaltalinu víðast íVestur- og Mið-Evrópu og SMHI bendir m.a. á að 23. apríl hafi mælst tæplega 30°C svo norðarlega sem í Belgíu.  Slíkt þykir næsta fáheyrt þetta snemma vor/sumars.

 

Athugasemdir

[Þorkell Guðbrands (IP-tala skráð) 8.5.2011 kl. 20:58]

Gott að sjá að þú ert farinn að hafa tíma til að blogga aftur, Einar. - Að allt öðru; Svo er að sjá að tölvuspár geri núna ráð fyrir að kuldapollurinn, sem hefur verið svo þrálátur vestan Grænlands, yfir Hellulandi og þeim slóðum, muni taka á rás austur yfir Grænlandsjökul á næstunni. Það verður fróðlegt að fylgjast með því hvort hann endurnýjar sig þar vestra og einnig hvernig afkvæmi hans, sem svo verður að heita, plumar sig yfir Atlantshafinu.